Bu insanlar niyə şkafda yatırdılar? - Qəribə həyat tərzi

Orta əsrlərdə həyat bir çox xüsusiyyətləri ilə fərqlənirdi və bu xüsusiyyətlər müasir insan üçün bəzən qəribə, bəzən isə tamamilə şokedici görünə bilər. Söhbət yalnız geyim tərzindən getmir. Məsələn, çox az adam bilir ki, o dövrlərdə insanların şkafda yatması adi bir hal idi.

Lent.az xarici mediaya istinadən xəbər verir ki, orta əsr Avropasında "şkaf-yataq" və ya "sandıq-yataq" adlanan mebel forması geniş yayılmışdı.

Bu taxta yataqlar qapalı konstruksiyaya malik idi və adətən içəridən qapana bilirdi. Onlar soyuq, dar və sıxlıq içində yaşayan ailələr üçün həm istilik, həm də məxfilik baxımından əvəzolunmaz idi. Bütün ailənin bir otaqda yaşadığı evlərdə bu yataqlar şəxsi məkanın yeganə forması hesab edilirdi. Həmçinin, orta əsrlərdə oğurluq hallarının geniş yayıldığını nəzərə alsaq, içəridən kilidlənə bilən bu yataqlar həm də təhlükəsizlik təmin edirdi.

Şkaf-yataqlar təkcə yataq funksiyası daşımırdı. Gündüzlər oturacaq və ya saxlama yeri kimi istifadə edilirdi. Bu mebel növü xüsusilə Şimali və Qərbi Avropada – Fransa, Belçika, Niderland və Skandinaviya ölkələrində XIX əsrin sonlarına qədər aktual olaraq qaldı. Ancaq zaman keçdikcə evlər daha geniş və isti oldu, bu səbəbdən belə yataqlara ehtiyac azaldı.

Maraqlıdır ki, bu qədim ideya XXI əsrdə yenidən aktual olur. Böyük şəhərlərdə mikromənzillərin və studiyaların yayılması ilə insanlar yenidən kompakt və şəxsi yataq sahələrinə ehtiyac duyurlar. Yaponiyada kapsul otellər, dünyada müxtəlif qatlanan və gizlədilə bilən yataq modelləri, həmçinin cottagecore stilində hazırlanmış taxta yataq nişləri buna nümunədir. Müasir mebel istehsalçıları artıq ənənəvi şkaf-yataqların yenilənmiş versiyalarını təqdim edirlər.

Belə görünür ki, böyük şəhərlərin səs-küyündən, işıqlarından və stressindən uzaqlaşmaq üçün insanlar yenidən keçmişin bu sadə və funksional həllinə üz tuturlar. Çünki bəzən ən yaxşı ideyalar məhz tarixdə insanlığı soyuqdan və yuxusuzluqdan qoruyanlar olur.

Bunu da qeyd edək ki, dünyanın ən qədim yaşayış evlərindən biri Farer adalarında yerləşir və artıq 17 nəsildir eyni ailəyə məxsusdur. Bu evin yaşı min ilə yaxındır. Bu fakt da tarixə və ənənəvi yaşayış formalarına marağın heç də keçmişdə qalmadığını sübut edir.

Telegramda izləyin