Stolun üstündəki kaktusun radiasiyadan qoruduğu doğrudurmu? Həqiqət nəhayət açıldı

İllərdir insanlar inanırlar ki, kaktus bitkisi kompüter, televizor və digər elektron cihazların yanında saxlanıldıqda zərərli radiasiyanı udur və sağlamlığı qoruyur.

Ancaq bu iddia nə dərəcədə doğrudur?

Lent.az xarici mediaya istinadən xəbər verir ki, kaktusun "radiasiyaya qarşı qalxan" olması ilə bağlı fikir elmi əsaslara deyil, daha çox xalq inanclarına və vizual assosiasiyalara əsaslanır. Bu inancın bir neçə səbəbi ola bilər:
Səhraya uyğunlaşma: Kaktuslar ekstremal mühitlərdə yaşaya bilir. Bu səbəblə onları dözümlü, qoruyucu simvol kimi görürlər.

Təbii qoruma hissi: İnsanlar görünməyən təhlükələrə (məsələn, elektromaqnit şüalanma) qarşı təbii həllər axtarır.

Kaktusun forması və tikanları: Bəziləri inanır ki, kaktusun tikanlı quruluşu elektromaqnit dalğaları "dəf edə" bilər. Amma bu yanaşmaların heç bir elmi sübutu yoxdur.

Elektromaqnit şüalanma nədir və nə qədər zərərlidir?

Kompüter, televizor və mobil telefonlar kimi cihazlar elektromaqnit dalğalar yayır (radiodalğalar, mikrodalğalar, görünən işıq və s.). Bunlar ionlaşdırıcı olmayan şüalanmadır, yəni xərçəng və ya digər ciddi xəstəliklərə səbəb ola biləcək radiasiya deyil.

Onlardan fərqli olaraq, ionlaşdırıcı radiasiya (məsələn, rentgen, radioaktiv maddələrdən gələn şüa) daha təhlükəlidir. Elektromaqnit dalğaların insan sağlamlığına təsiri ilə bağlı tədqiqatlar aparılsa da, kaktusun bu şüaları udaraq zərəri azaltdığı barədə heç bir elmi fakt yoxdur.

Kaktus elektromaqnit şüalanmanı udurmu?

Xeyr. Kaktuslar elektromaqnit şüalanmanı udmur, neytrallaşdırmır və yayılmasına mane olmur. Bu, tamamilə mifdir.

Bu barədə heç bir elmi araşdırma kaktusun qoruyucu xüsusiyyətini sübut etməyib. Yəni kaktus texnoloji cihazlardan gələn şüanı udmur, sağlamlığımızı cihazlardan gələn elektromaqnit dalğalardan qorumaq üçün vasitə rolunu oynamır.

Telegramda izləyin