Bazar yerində 5 nəfəri qətlə yetirib sakit şəkildə hadisə yerindən uzaqlaşdı - VİDEO

Taylandın paytaxtı Banqkokda izdihamlı bazar yerində baş verən silahlı hücum dəhşət saçıb.

Sonxeber.az xəbər verir ki, qara köynək geyinmiş və qarşısında çanta daşıyan silahlı şəxs günorta saatlarında "Or Tor Kor" bazarına gələrək ətrafa nəzarətsiz şəkildə atəş açıb.

Hadisə nəticəsində azı 5 nəfər həlak olub. Ölənlər arasında bazar satıcıları və mühafizəçilər də var.

Silahlı şəxs hücumdan sonra ərazidən qaçaraq qısa müddət sonra öz silahı ilə intihar edib. Hadisə anı təhlükəsizlik kameralarına düşüb – kadrlarda onun əlində tapança ilə heç bir təşviş göstərmədən avtodayanacağa doğru getdiyi görünür.

Tayland polisi hadisənin səbəblərini araşdırır. Hücum edən şəxsin kimliyi hələlik açıqlanmayıb. Polis eyni zamanda hadisənin Taylandla Kamboca arasında son günlərdə yenidən alovlanan sərhəd qarşıdurmaları ilə əlaqəli olub-olmadığını da araşdırır.

Sözügedən hücum Tayland və Kamboca arasında davam edən sərhəd münaqişəsinin gərgin mərhələyə keçdiyi bir vaxtda baş verib. Keçən həftə sərhəd bölgəsində partlayan mina nəticəsində beş Tayland əsgəri yaralanıb və bu insidentdən sonra iki ölkə arasında yeni silahlı toqquşmalar başlayıb.

Son günlərdə Tayland, Kambocanın BM-21 tipli raket hücumlarına cavab olaraq F-16 qırıcı təyyarələri ilə əks-hücumlar təşkil edib. İndiyədək baş verən toqquşmalarda 35 nəfər həyatını itirib, 260 mindən çox insan isə evlərini tərk etməyə məcbur qalıb.

Telegramda izləyin