Rusiyaya verilən müddət daralır: Vaşinqton-Moskva münasibətlərində yeni dövr başlayır?

ABŞ Prezidenti Donald Trampın Rusiya ilə bağlı verdiyi son bəyanat siyasi dairələrdə rezonans doğurub. O, Kremlə açıq şəkildə 50 gün vaxt verdiyini bildirərək, "əgər bu müddətdə müəyyən şərtlər yerinə yetirilməzsə, nəticələr çox ağır olacaq" deyə xəbərdarlıq edib. Müddətlə bağlı artıq geri sayım başladığı üçün, bunun Vaşinqton-Moskva münasibətlərində yeni mərhələnin başlanğıcı ola biləcəyi də istisna deyil.

Məsələ ilə bağlı Oxu.Az-a danışan sabiq deputat, siyasi şərhçi Yusif Bağırzadə bildirib ki, Donald Trampın Vladimir Putinə qarşı mövqeyi dəyişməyib:

"Rusiyaya 50 gün də ona görə verilib ki, bu müddət ərzində Tramp bununla bağlı daxildən və xaricdən gələn təzyiqləri dəf etsin. Digər tərəfdən isə, bu müddət ərzində Rusiyaya qarşı ediləcək mümkün sanksiyaların qarşısı alınacaq, həm də daha çox Ukrayna ərazisinin ələ keçirilməsinə imkan yaranacaq. Hətta bir müddət bundan əvvəl Rusiyanın yay aylarında 700 min əsgərlə Ukraynaya qarşı genişmiqyaslı hücuma hazırlaşdığı ilə bağlı məlumat yayılmışdı. Bu 50 gün də bəs edir ki, Ukraynanın yeni əraziləri istila edilsin. Çünki Ukrayna torpaqlarının bir hissəsi bataqlıqdan ibarətdir. Payız, qış mövsümdə bu bataqlıqda irəliləmək Rusiya ordusu üçün çox çətin olar. Yay ayları bunun üçün çox əlverişlidir".

"Digər tərəfdən, Avropa İttifaqı (Aİ) artıq Rusiyaya qarşı 18-ci sanksiya paketini təsdiqləyib. Həmin sənəddə Rusiyanın atom sənayesinə dair müddəalar öz əksini tapmasa da, 22 bankın, fiziki və hüquq şəxslərin, həmçinin Rusiya neftini daşıyan özünə aid olan və olmayan tankerlərin də sanksiyaya məruz qalacağı qeyd olunub. Faktiki olaraq Aİ bununla həm də Tramp administrasiyasını fakt qarşısında qoyub", - deyə sabiq parlamentari qeyd edib.

Müsahibimiz əlavə edib ki, Tramp hazırda Şotlandiyada 5 günlük səfərdədir və bu səfər ərəfəsində Avropa İttifaqına daxil olan ölkələrin rəhbərləri, həm də ittifaqa daxil olan komissarlarla görüşlər olacaq:

"Bu səfər çərçivəsində Trampın həm Böyük Britaniyanın Baş naziri Kir Starmer, Avropa komissarları, eləcə də Almaniya Konsleri Fridirix Mertslə görüşləri gözlənilir. Ola bilər ki, bu görüşlərdə Trampa konkret şərtlər irəli sürüləcək ki, bu əlli gün müddətində Rusiya-Ukrayna müharibəsində sülh danışıqları ilə bağlı irəliləyiş olmasa, sanksiyalar tətbiq olunmalıdır".

"Artıq Ukraynaya üç "Patriot" hava hücumundan müdafiə sistemi tədarük edilib. Hazırda isə dünyada 180-ə yaxın "Patriot" var. Onlardan 94-ü ABŞ-də, qalanları isə Avropa dövlətlərindədir. Təxminən, bu patriotların 17-sinin Ukraynaya verilməsi nəzərdə tutulur. Ona görə də proses belə də davam edəcək. Yəni, bu müharibənin hələlik ucu-bucağı görünmür. Üstəlik, danışıqlar masasında verilən təkliflər də reallıqdan uzaqdır və hərbi əsirlərin, həlak olanların mübadiləsindən başqa irəliləyiş yoxdur", - analitik fikrini yekunlaşdırıb.

Telegramda izləyin