Petropavlovsk-Kamçatskda 7,5 maqnitudaya qədər afterşok XƏBƏRDARLIĞI

Kamçatkada bu gün baş verən güclü zəlzələdən sonra vəziyyət gərgin olaraq qalır. Alimlər yaxın günlərdə 7.5 maqnitudaya qədər afterşokların baş verə biləcəyini və Avaçinski körfəzi yaxınlığında sunami təhlükəsinin davam etdiyini bildirirlər.

Oxu.Az TASS agentliyinə istinadla xəbər verir ki, bu barədə Kamçatka diyarı üzrə Fövqəladə Hallar Nazirliyinin Baş İdarəsi məlumat yayıb.

Qeyd olunub ki, baş vermiş güclü zəlzələ ilə bağlı Rusiya Zəlzələlərin Proqnozlaşdırılması, Seysmik Təhlükə və Riskin Qiymətləndirilməsi üzrə Ekspert Şurasının növbədənkənar iclası keçirilib.

"Alimlərin rəyinə əsasən, yaxın vaxtlarda Petropavlovsk-Kamçatski şəhər dairəsində intensivliyi 6 bala çatan, maqnitudası isə 7.5-ə qədər olan afterşoklar baş verə bilər. Bununla yanaşı, Avaçinski körfəzi sahillərində təhlükəli sunami dalğalarının yaranması ehtimal olunur", - deyə məlumatda bildirilib.

Fövqəladə Hallar Nazirliyi vətəndaşlara Avaçinski körfəzi və Sakit okean akvatoriyasına yaxın ərazilərdən uzaq durmağı tövsiyə edir.

Xatırladaq ki, iyulun 30-da yerli vaxtla saat 11:24-də (Bakı vaxtı ilə 3:24) Sakit okeanda Kamçatka yaxınlığında 8.7 bal gücündə zəlzələ baş verib. Təkanların episentri Petropavlovsk-Kamçatskdan 161 km şərqdə, 32 km dərinlikdə yerləşib. Bu, 1952-ci ildən bəri regionda baş verən ən güclü zəlzələdir. Sunami təhlükəsi elan edilib, dörd metrə qədər hündürlükdə dalğalar qeydə alınıb. Yaralananlar var, bir nəfər həlak olub.

Çili, Meksika, Çinin şərq sahillərində, Tayvanda, Ekvador və Solomon adalarında, həmçinin ABŞ-nin Havay, Kaliforniya və Oreqon ştatlarında sunami təhlükəsi elan edilib.

Telegramda izləyin