İnsanlar istidən axmaq olurlar: belə havanın beyinə necə təsir etdiyi AÇIQLANDI

İsti hava hətta ölümlə nəticələnə biləcək bir çox xəstəliyə səbəb ola bilər.

İqlim dəyişikliyi isti dövrlərin artmasına səbəb olduğundan, elm adamları həddindən artıq istinin insan beyninin işinə necə təsir etdiyini araşdırmağa qərar veriblər.

Hazırda təxminən 15.000 uşaqdan birində epilepsiya formasını ehtiva edən nevroloji xəstəlik olan Dravet sindromu var.

Lent.az-ın xarici mediaya istinadən məlumatına görə, bu cür hücumlar çox vaxt autizm, nitq çətinliyi, qidalanma problemləri və s. ilə müşayiət olunur.

London Universitet Kollecindən nevroloq Sancay Sisodiya, Dravet sindromunun istinin ağırlaşa biləcəyi bir çox nevroloji vəziyyətdən yalnız biri olduğunu söyləyib.

Həmçinin, artan temperatur və rütubətin təsiri altında epilepsiya, insult, ensefalit, dağınıq skleroz, miqren və bir sıra digər xəstəliklər daha tez-tez qeydə alınır.

Bildirilir ki, çöldəki havanın temperaturu +26°C-dən yuxarı olarsa, insanların konsentrasiyası azalır, yaddaşları pisləşir, sadə məsələləri həll etməkdə çətinlik çəkirlər.

Qeyd edilir ki, orta hesabla insan beyninin temperaturu nadir hallarda bədənin temperaturunu 1 °C-dən çox üstələyir. Bununla belə, insan düşünəndə, nəyisə xatırlayanda və ya ətraf aləmə reaksiya verəndə beyin əhəmiyyətli miqdarda öz istiliyini istehsal edir.

Bu səbəbdən bədənimiz beyni soyutmaq üçün daha çox çalışmalıdır. Qeyd olunur ki, həddindən artıq istilər bütün insanlarda beyin funksiyasını dəyişsə də, ən çox nevroloji xəstəlikləri olan insanlar əziyyət çəkir.

Həmçinin gecələr yüksək hərarət insanların normal yatmasına mane olur ki, bu da onların əhvalını pisləşdirir, həm də müəyyən xəstəliklərin əlamətlərini artırır. Məhz buna görədir ki, insanlar yayda tez-tez zəngli saatdan əvvəl oyanır, əsəbiləşir və yorğun olurlar.

"Epilepsiya xəstəsi olan bir çox insan üçün zəif yuxu spazm riskini artıra bilər". – Sisodiya vurğulayır.

Məlumatlar həmçinin göstərir ki, isti günlər demensiyalı insanlar arasında xəstəxanaya yerləşdirmə və ölüm hallarını artırır, çünki qismən yaşlı insanlar bədən istiliyini daha az tənzimləyə bilirlər.

Qeyd olunur ki, bir araşdırmada elm adamları 25 ölkədə insultdan ölüm məlumatlarını təhlil edib və müəyyən ediblər ki, işemik insultdan ölən 1000 nəfərdən əlavə iki ölüm hadisəsi ən isti günlərdə baş verib.

Böyük Britaniyadakı London İmperial Kollecində qlobal qadın sağlamlığı professoru Ceyn Herst deyir: "Həddindən artıq istilik və vaxtından əvvəl doğuş kimi mənfi hamiləlik nəticələri arasında əlaqə var".

Göstərildiyi kimi, istilərin fonunda insanlar daha aqressivləşirlər. Anormal istilər zamanı küçədə məişət zorakılığı hallarının sayı 5 faiz artır.

Ona görə də isti havalarda çoxlu su içməli və bədəninizin sərin olmasına diqqət etməlisiniz, əks halda beyniniz artıq yükün öhdəsindən gələ bilməz. Maraqlıdır ki, 2023-cü ilin iyunu qeydə alınmış tarixdə ən isti ay olub və bu, hələ başlanğıcdır.

Telegramda izləyin