Stiletto geyinirsiniz? - Hansı ölçü və forma idealdır

Qadınlara 3-5 santimetrdən çox olmayan hündürlükdə dikdaban ayaqqabı geyinmək tövsiyə olunur. Həddindən artıq hündür dikdabanlar duruş pozuntularına, bel ağrılarına və oynaq problemlərinə səbəb ola bilər.

Lent.az bu barədə xarici mediaya istinadən xəbər verir.

Dikdaban geyinmək hansı problemlərə yol açır?

Ortoped və cərrah Eboni Vinsent-Slit qeyd edib ki, dikdaban ayaqqabılar qadınlarda ayaq ağrılarının ən çox rast gəlinən səbəblərindən biridir:

"Mən müntəzəm olaraq nevrinomalardan, bursitdən, çəkic barmaq sindromundan, stres sınıqlarından və artritin erkən mərhələlərindən əziyyət çəkən pasiyentləri müalicə edirəm. Bu problemlərin səbəbi ya birbaşa olaraq, ya da dolayı yolla uzun müddət dikdaban ayaqqabı geyinməkdir".

Ən çox zərər bir dəfəlik dikdaban geyinməkdən deyil, illərlə dəbli, lakin rahat olmayan ayaqqabıların yığılmış təsirindən qaynaqlanır.

İdeal topuq hündürlüyü nə qədər olmalıdır?
Həkimin sözlərinə görə, topuğun hündürlüyü 5 sm-dən çox olmamalıdır. Bu hündürlük sübutlara əsaslanan tədqiqatlarla təsdiqlənib.

Belə ki, 5 sm-dən hündür ayaqqabı geyinmək ayağın ön hissəsinə düşən təzyiqi düzdaban ayaqqabılarla müqayisədə 76% artırır. Bu isə zamanla xroniki ağrılar və zədələrə gətirib çıxarır.

Ayaqqabının strukturu və dəstəyi də topuq qədər vacibdir. 5 sm-dən alçaq topuqlu modelləri seçərkən burun hissəsinin geniş olmasına diqqət edin.

İti burunlu ayaqqabılardan uzaq durmaq lazımdır. Onlar bursitə və sinirlərin sıxılmasına səbəb ola bilər.

Ayaqları dəstəkləyən ayaqqabı modelləri

Podoloq Merion Yau Harley bir neçə uyğun model tövsiyə edib:

Platformalı topuqlar – həm daban, həm də ayağın ön hissəsini qaldırdığı üçün ayağın meyilli vəziyyəti azalır və nəticədə daha az gərginlik yaranır. Daha sabitdir.

Geniş blok topuqlar və platforma ayaqqabılar (tanqetka) – şpilka ilə müqayisədə sabitliyi artırır və ayağa düşən təzyiqi azaldır.

Kəmərli və möhkəm bağlanan modellər – xüsusilə ayağın ön hissəsində və topuq ətrafında qalın kəməri olan modellər sürüşmənin qarşısını alır.

Açıq burunlu modellər – barmaqların sıxılmamasına imkan verir və ağrı ehtimalını azaldır.

Ayaqları dikdaban geyinməyə necə hazırlamaq olar?
Mütəxəssislər yeni ayaqqabını tədbirə çox yaxın zamanda almağı tövsiyə etmirlər. Yeni ayaqqabını tədricən geyinmək və əvvəlcə evdə "açmaq" vacibdir. Əgər tez-tez dikdaban geyinirsinizsə, nazik ortopedik içliklər almaq faydalı ola bilər. Bu, rahatlığı və dəstəyi artırır.

Telegramda izləyin