Türkiyənin ən bədbəxt şəhəri açıqlanıb

Türkiyə Statistika Qurumu (TÜİK) tərəfindən aparılan "Yaşam Memnuniyyəti Araşdırması"nın nəticələrinə əsasən, əhalisi 818 min 23 nəfər olan Trabzon, 11,19 faiz göstərici ilə "Türkiyənin ən bədbəxt şəhəri" seçilib.

Sonxeber.az türk mediasına istinadən xəbər verir ki, araşdırma barədə danışan bəzi bölgə sakinləri, şəhərdəki ümumi narazılığın səbəbini Trabzonspor klubunun uğursuz nəticələri ilə əlaqələndiriblər.

Siyahıda Qara dəniz bölgəsindən Samsun, Ordu və Gümüşhane də "ən bədbəxt şəhərlər" sırasında ön yerlərdə qərarlaşıb. Türkiyənin ən böyük üç şəhəri — İstanbul, Ankara və İzmir də siyahıda yer alıb. Trabzonu "ən bədbəxt" siyahısında Antalya, İzmir və Ankara izləyib. 15 milyon 907 min 951 nəfərin yaşadığı İstanbul isə 9,12 faiz göstərici ilə 6-cı sırada qərarlaşıb. Araşdırma, böyük şəhərlərlə yanaşı, orta və kiçik ölçülü şəhərlərdə də bədbəxtlik səviyyəsinin yüksək olduğunu ortaya qoyub.

Qeyd edək ki, əvvəlki araşdırmalarda Qara dəniz bölgəsindən Sinop 77,7 faiz göstərici ilə "Türkiyənin ən xoşbəxt şəhəri" elan olunmuşdu.

Trabzon sakini Ömər Güney bu nəticələrə etiraz edərək bildirib:

"Trabzonda bədbəxt olmaq mümkün deyil. Yaylası, kəndi, çayı, meşəsi var. İnsanlar mehriban, qonaqpərvərdir. Ac qalsan, qapı döysən, sənə yemək verərlər. Mən bu nəticələrə inanmıram. Heç nə edə bilməsəniz belə, səhər kuymak (məşhur yerli yemək) yeyin, xoşbəxt olarsınız."

Şəhər sakini Mələk Sevencan isə deyib:

"Biz bədbəxt deyilik. Bəzən olur ki, kədərlənirik, amma Trabzonun ‘ən bədbəxt şəhər’ seçildiyini eşidəndə təəccübləndim. Ümumiyyətlə şən və zarafatcıl insanlarıq, xoşbəxtik. Bu nəticənin haradan çıxdığını anlamıram."

Telegramda izləyin