İsveçdə demoqrafik böhran: Ölkə yüzlərlə bağçanı bağlamağa hazırlaşır

İsveçdə doğum səviyyəsinin kəskin azalması ölkəni ciddi demoqrafik böhranla üz-üzə qoyub. Əgər mövcud mənfi tendensiya davam edərsə, növbəti 10 ildə ölkədə hər 10 uşaq bağçasından biri fəaliyyətini dayandıracaq.

Oxu.Az-ın "Dagens Nyheter" qəzetinə istinadən verdiyi məlumata görə, iki il əvvəl məktəbəqədər yaş qruplarında ilk azalma qeydə alınıb.

Sundsvall bələdiyyəsinin məktəbəqədər təhsil müəssisələri şöbəsinin müdiri Mikael Nilsson Ritlinger bildirib ki, proses artıq üçüncü ildir davam edir:

"Bələdiyyələr çətin qərarlar qəbul etmək məcburiyyətində qalır. Biz valideynlər üçün narahatlığı minimuma endirmək üçün bağçaları yalnız digər məktəbəqədər müəssisələrin olduğu ərazilərdə bağlamağa çalışırıq."

Demoqrafların proqnozlarına görə, 2024-2034-cü illər ərzində İsveçdə məktəbəqədər yaşlı uşaqların sayı 43 min nəfər azalacaq. Bu, təxminən 800 uşaq bağçasının bağlanması və yüzlərlə əməkdaşın işsiz qalması deməkdir. Təhsil sistemi də zərbə alacaq - 2032-ci ilə qədər 6-15 yaş arası şagirdlərin sayının da kəskin azalacağı gözlənilir.

2024-cü ildə İsveçdə doğum göstəricisi hər qadına 1.43 uşaq səviyyəsinə enib - bu, müşahidələr tarixində ən aşağı göstəricidir. Müqayisə üçün, on il əvvəl bu rəqəm 1.88 idi.

Mütəxəssislər xəbərdarlıq edirlər ki, əgər tendensiya dəyişməsə, isveçlilərin hər yeni nəsli əvvəlkindən 30% az olacaq. Bu isə əmək qabiliyyətli əhalinin azalması, sosial xərclərin artması və vergi daxilolmalarının zəifləməsi kimi ciddi sosial-iqtisadi nəticələr doğuracaq.

Telegramda izləyin