Yayda su balansının pozulmasının yaratdığı fəsadlar

İsti mövsümdə həddindən artıq və ya az maye qəbulu ən çox şişkinliyin yaranmasına səbəb olur.

Oxu.Az xəbər verir ki, bu barədə gazeta.ru-ya rusiyalı dermatoloq-kosmetoloq Qalina Amosova məlumat verib.

"Hər şeydən əvvəl, yüksək temperatur qan damarlarının genişlənməsinə səbəb olur, bunun nəticəsində qan dövranı yavaşlayır ki, bu da toxumalarda mayenin durğunluğuna səbəb olur. Bundan sonra bədən soyumaq üçün daha çox tərləməyə başlayır, lakin içmə rejimi pozulduqda - çox az və ya əksinə, çox maye qəbul edilərsə - şişkinlik meydana gəlir", - deyə o bildirib.

Amosova qeyd edib ki, maye tez-tez, ancaq kiçik hissələrlə, otaq temperaturunda içilməlidir. Dermatoloqun bildirdiyinə görə, orta dərəcədə istehlak ediıldikdə, yaşıl çay, şəkərsiz meyvə içkiləri, xiyar və ya limonlu su, qarpız, kərəviz, cəfəri və zəncəfil artıq mayeni orqanizmdən xaric etməyə kömək edir. Amosova əlavə edib ki, şişkinliyə səbəb olan digər bir amil duzlu qəlyanaltıların, spirtin və şirin içkilərin, o cümlədən qablaşdırılmış şirələrin həddindən artıq istehlakıdır. Bütün bunlar bədəndə suyun saxlanmasına səbəb olur.

Kosmetoloq qeyd edib ki, istidə şişkinlik adətən qravitasiya və qan dövranının xüsusiyyətlərinə görə mayenin ən asan yığıldığı yerlərdə müşahidə olunur. Bunlara ayaqlar, xüsusilə də topuq və ayağın pəncələri, gözətrafı sahə də daxil olmaqla üz aiddir. Amosova bildirib ki, əllərin şişməsi daha az rast gəlinir, lakin yenə də mümkündür, adətən kompüterlə çox işləyən və ya qan damarlarını sıxan sıx zinət əşyaları taxan insanlarda rast gəlinir.

O əlavə edib ki, şişlik bir sıra xəstəliklərin - varikoz və xroniki damar çatışmazlığı, ürək problemləri, böyrək xəstəlikləri, limfedema və hormonal pozğunluqlar olduqda daha kəskin ola bilər.

Telegramda izləyin