Ekspert: Parlaq çamadan oğrular üçün "cazibədar hədəf"dir

Parlaq və diqqətçəkən çamadanlar səyahət zamanı təhlükə yarada bilər.

Lent.az xarici mediaya isinadən xəbər verir ki, səyahət eksperti Andrea Platania ən təhlükəsiz çamadanların adi və ya köhnə formada olduğunu bildirib.

"Parlaq çamadan dəbli görünə bilər, amma o, lazım olmayan adamların diqqətini cəlb edir. Əgər təhlükəsiz səyahət etmək istəyirsinizsə, diqqət çəkməyən, adi çamadan seçin. Belə olduqda o, nə oğruların marağına səbəb olur, nə də içində dəyərli əşyaların ola biləcəyini göstərir", – deyə ekspert vurğulayıb.

Platanianın sözlərinə görə, məsələ təkcə çamadanın görünüşündə deyil. Onu düzgün bağlamaq da vacibdir. Hətta sadə asma qıfıl belə oğruları çəkindirə bilər, çünki onlar maneə ilə rastlaşanda adətən daha asan hədəflərə yönəlirlər.

Bununla yanaşı, çamadanın üzərinə kiçik lent, stiker və ya nəzərə çarpmayan işarə qoymaq tövsiyə olunur. Bu, bagaj verilişi zamanı onu tez tanımağa kömək edəcək.

Ekspert həmçinin səyahətçilərə çamadanlarını qorumaq üçün treker istifadəsini də məsləhət görür. Belə cihaz çamadanın içinə yerləşdirilir və itki və ya oğurluq halında yerini izləməyə imkan verir. Bu, həm də sığorta prosesini sadələşdirir.

Mütəxəssislər oğurluq halını dərhal bildirməyi, hava limanına getməzdən əvvəl isə çamadanın bir neçə şəklini çəkməyi də tövsiyə edirlər. Bu addımlar əşyaların tapılma və geri qaytarılma şansını artırır.

Digər xəbərdarlıqlar
Andrea Platania daha əvvəl səyahətə markasız dərman və ya qida əlavələrinin aparılmamasını tövsiyə edib. Onun sözlərinə görə, bəzi ölkələrdə kodein və ya antihistaminlər kimi sadə dərmanlar belə xüsusi resept və sənəd tələb edə bilər.

Bundan başqa, mütəxəssislər təyyarəyə minərkən geyinməmək lazım olan 5 əşyanı da açıqlayıblar: dar leggins və cinslər, dar kəmərlər və korreksiyaedici alt paltarları, sərt tikişli geyimlər, sıx və sərt ayaqqabılar.

Telegramda izləyin