Dünyanın ən uzun modellərindən biri olan qadının həyat yoldaşı ilə boy fərqi hər kəsi təəccübləndirir

Braziliyada yaşayan 26 yaşlı model Elisane Silva qeyri-adi boyu ilə diqqət çəkir. O, cəmi 10 yaşında olarkən 1.75 metr boya çataraq ailəsini təəccübləndirib. Daha sonra aparılan müayinələrdə hipofiz vəzində xoşxassəli şiş aşkar olunub. Bu şişin artıq böyümə hormonu ifraz etməsi nəticəsində Elisane "jigantizm" diaqnozu alıb.

Sonxeber.az xarici mediaya istinadən xəbər verir ki, maddi imkanlarının məhdud olması səbəbindən ailəsi uzun müddət tibbi testləri edə bilməyib. Yalnız bir televiziya kanalı onun hekayəsini yayımlamaq müqabilində müalicə xərclərini qarşılayıb. Diaqnoz müəyyən olunsa da, Elisane üçün məktəb həyatı işgəncəyə çevrilib. Sinif yoldaşları ona "div" və "qüllə" deyə müraciət edir, daim lağ edirdilər. Psixoloji təzyiqlərə dözə bilməyən qız 17 yaşında məktəbi tərk edib.

2011-ci ildə Elisane həyat yoldaşı Francinaldo Da Silva Karvalho ilə tanış olub. 1.62 metr boyunda olan Francinaldo onunla fərqli yanaşmayaraq insani münasibət göstərib. Elisane "Ona dərhal aşiq oldum. Boy fərqi bizim üçün heç vaxt problem olmadı, bir-birimizi olduğumuz kimi sevdik" deyib. Cütlük 2015-ci ildə ailə qurub, hazırda 3 yaşlı oğulları Anjelo böyüyür.

Uzun müddət lağ və təcrid yaşayan Elisane artıq öz bədəni ilə barışıb:

"Əvvəllər insanlar mənə qəribə baxırdı, indi isə qürur duyuram. Çünki məndən başqa belə biri yoxdur və bu məni xüsusi edir", – deyə o bildirib.

Silva hazırda peşəkar model olmaq arzusundadır. O, foto çəkilişlər vasitəsilə özünə inam qazandığını deyir:

"Ajanslar hələ məni kəşf etməyib, amma bu çəkilişlər sayəsində özümü sevməyi öyrəndim."

Telegramda izləyin