Məşhur kurortda turistlərlə "müharibə" başladı

Turistlərin axınından yorulan Venesiya, qaydaları pozanlarla ciddi mübarizə aparmağa qərar verib. Girişə məhdudiyyətlərdən tutmuş GPS vasitəsilə hərəkətlərinə nəzarətədək. Oxşar sərt, bəzən isə qeyri-adi tədbirlər digər məşhur istiqamətlərdə də tətbiq olunur. Kapri, Roma və Sardiniyada.

Lent.az xarici KİV-ə istinadən xəbər verir ki, bu mövzu ilə bağlı əhali narazılıq edir. Venesiyanın tarixi mərkəzi demək olar ki, turistlərlə dolub-daşır. Yerli sakinlər isə qonaqların şəhərə hörmətsizlik etdiyini düşünərək narazılıqlarını daha açıq şəkildə ifadə etməyə başlayıblar. Cavab olaraq hakimiyyət qayda-qanun yaratmaq üçün kampaniya başlayıb. Bu təşəbbüslərdən biri qayda pozan turistlərin "qara siyahısı"nın hazırlanmasıdır.

"Biz əyləncə parkı deyilik", - deyə Veneto regionunun prezidenti Luka Dzayya bildirib.

Onun sözlərinə görə, hakimiyyət şəhərə hörmətsizlik edən turistlərə, həmçinin qanun pozuntularına qarşı qətiyyətli addımlar atmaq niyyətindədir. Ən çox müzakirə olunan məsələ qayda pozan turistlər üçün şəhərə giriş qadağasının tətbiq edilməsi olub. Belə tədbir adətən aqressiv futbol azarkeşlərinə qarşı tətbiq olunur.

GPS ilə nəzarət və cibgirlik problemi

Dzayya cib oğruluğu məsələsinə də toxunaraq, qayda pozanların GPS çipləri olan elektron bilərziklərlə izlənilməsini təklif edib. Bu cihazlar polisə artıq tanınmış cinayətkarların yenidən fəaliyyət göstərməyə çalışdığı barədə məlumat verə bilər. Nəzarət zonalarına dəmir yolu vağzalı ilə Rialto körpüsü və San-Markonun mərkəzi meydanı arasındakı izdihamlı küçələr də daxildir.

Hadisəni daha da kəskinləşdirən nümunə

Problemin aktuallığını ABŞ-dan olan 50 yaşlı turist Kristin Qrinin başına gələn hadisə göstərir. Onun Venesiyada olduğu vaxt pasportu, pulqabısı və elektron cihazları oğurlanıb. Apple izləyicisinin köməyi ilə qadın cinayətdə şübhəli bilinən yeniyetmə qızlardan ibarət qrupu özü müəyyənləşdirib. Qrin onlardan biri ilə açıq toqquşmaya girərək, polis gələnədək təxminən bir saat onu saçından tutaraq saxlayıb.

Telegramda izləyin