Nəhəng dəniz canlısı sahilə çıxdı - Görənlər əjdahaya oxşatdı

Uels sahilinə nəhəng dəniz canlısı çıxıb.

BAKU.WS xəbər verir ki, bu barədə "Metro" nəşri məlumat yayıb.

Bildirilib ki, Uelsin sahilində nəhəng dəniz heyvanının cəsədi tapılıb. Tapıntı yerli sakinlər və sosial şəbəkə istifadəçiləri arasında böyük müzakirələrə səbəb olub. İlk ehtimallar arasında köpək balığından tutmuş mifik "uels əjdahası"na qədər fikirlər səslənib. Lakin ekspertlər müəyyənləşdiriblər ki, bu, nadir hallarda rast gəlinən finvaldır mavi balinadan sonra ikinci ən böyük balina növü.

KİV-in məlumatına görə, balinanın uzunluğu 21 metrdən çox, çəkisi isə təxminən 50 ton olub. Onun aşağı çənəsinin uzunluğu 5 metrə çatıb.

"Bu, nadir hadisədir: Uels sahilində finval görmək olduqca qeyri-adi haldır", - deyə dəniz mühitinin monitorinqi üzrə koordinator Metyu Uestfild bildirib.

Adətən finvallar Kornuoll, İrlandiya və Şotlandiya sahillərində müşahidə olunur. Onların İrlandiya dənizinə daxil olması isə çox nadir haldır. Buna görə də tapıntı alimlərin marağına səbəb olub: cəsəd London zooparkına aparılacaq və orada DNT analizi, çirkləndirici maddələrin, o cümlədən mikroplastikin öyrənilməsi və beynəlxalq genetik layihələr üçün tədqiqat aparılacaq.

Lakin balinanın cəsədi artıq parçalanmış vəziyyətdədir onun üzərində digər dəniz yırtıcılarının, o cümlədən köpək balıqlarının qidalanma izləri müşahidə olunub.

Telegramda izləyin