Qazaxıstanda "nəhəng qapı"ya bənzər qayalıq kəşfi müzakirələrə səbəb oldu

Qazaxıstanın şərqində yerləşən Dzungarian Alatau dağlarında aşkarlandığı iddia edilən nəhəng qapı formasında qayalıq sosial şəbəkələrdə geniş müzakirə olunub.

Sonxeber.az türk mediasına istinadən xəbər verir ki, yadplanetli nəzəriyyələrindən dini yozumlara qədər bir çox iddia irəli sürülsə də, mütəxəssislər bunun təbii geoloji proseslərin nəticəsi olduğunu bildirirlər.

Daily Mail qəzetində dərc olunan məlumata görə, sosial şəbəkə Reddit-də yayımlanan 30 saniyəlik video qısa zamanda gündəmə çevrilib. Görüntülərdə karlı ərazidə hərəkət edən iki araşdırmaçının ardınca dron kamerası qalxır və dağın yamacında hündürlüyü və eni təxminən 12 metr olan, yarımdairə şəklində nəhəng "qapı"ya bənzər qayalıq üzə çıxır.

Qayalığın görüntüləri minlərlə şərh alıb. Bəzi izləyicilər onu "antik dövrdə uzaylıların izi" kimi dəyərləndirərkən, digərləri isə dini mətnlərdə adı keçən Yəcüc-Məcüc anlayışı ilə əlaqələndiriblər.

Geologiya mütəxəssisləri isə bu strukturu böyük ehtimalla təbii bir formasiya hesab edirlər. Onların sözlərinə görə, bu cür qeyri-adi görünüşlü qayalıqlar milyonlarla il davam edən geoloji proseslərin nəticəsində yarana bilir.

Hadisə hələ də "təbiət möcüzəsi, yoxsa insan ötəsi bir iz?" sualları ilə sosial şəbəkələrin ən çox müzakirə olunan mövzuları arasında qalmaqdadır.

Xalq inanclarında Yəcüc-Məcüc

Əfsanələrə görə, Yəcüc-Məcüc yer altında saxlanılan və qiyamətə yaxın meydana çıxacaq nəhəng, dağıdıcı topluluq kimi təsvir olunur. Bəzi rəvayətlərdə onlar "barbar tayfalar", digərlərində isə "insanüstü varlıqlar" kimi şərh edilir.

Telegramda izləyin