Saakaşvilinin partiyasının keçmiş liderinə qarşı ittiham irəli sürüldü

Gürcüstanın Baş Prokurorluğu keçmiş prezident Mixail Saakaşvilinin təsis etdiyi müxalif Vahid Milli Hərəkat Partiyasının keçmiş sədri Levan Xabeişviliyə qarşı hökuməti devirməyə açıq çağırışlar maddəsi üzrə ittiham irəli sürüb.

Oxu.Az-ın TASS-a istinadən xəbərinə görə, bu barədə brifinqdə prokuror Beka Kvitsiani məlumat verib.

"Əldə edilmiş sübutlara əsasən, Levan Xabeişviliyə qarşı, həmçinin Gürcüstan Cinayət Məcəlləsinin 317-ci maddəsi ilə də ittiham irəli sürülüb ki, bu da hakimiyyətin devrilməsinə açıq çağırışlar deməkdir. Təqsirləndirilən şəxs 2025-ci ilin iyun ayından etibarən televiziya və sosial şəbəkələr vasitəsilə vətəndaşları sistemli şəkildə hakimiyyətin devrilməsi kimi hərəkətlərə çağırıb, konkret tarix və yerlər barədə danışıb", - deyə prokuror bildirib.

Onun sözlərinə görə, Xabeişvili sentyabrın 11-də saxlanılıb. İlkin olaraq ona hüquq-mühafizə orqanlarının əməkdaşlarına rüşvət vəd etmək ittihamı irəli sürülüb. Xüsusilə, prokurorluğun məlumatına görə, partiyanın keçmiş sədri vəzifəsini yerinə yetirməkdən imtina edəcək və ona məxfi məlumatlar da daxil olmaqla, məlumatlar ötürəcək polis əməkdaşlarına 200 min dollar təklif edib. Gürcüstan Prokurorluğu siyasətçinin barəsində həbs-qətimkan tədbirinin seçilməsinə dair vəsatətlə Tbilisi Şəhər Məhkəməsinə müraciət edəcək.

Bundan başqa, sentyabrın 11-də Xabeişvili ilə birlikdə müxalifətin "Dəyişikliklər naminə koalisiyası"nın üzvü, ölkənin keçmiş baş prokuroru Murtaz Zodelava da saxlanılıb. O, ilkin olaraq Xabeişvilinin telefonunu gizlətmək cəhdində ittiham olunub, hansı ki, hüquq-mühafizə orqanlarının əməkdaşları onu dəlil kimi götürməli idilər. Zodelavaya qarşı Gürcüstan Cinayət Məcəlləsinin "İctimai asayişi qoruyan şəxsə və ya hakimiyyətin digər nümayəndəsinə qarşı müqavimət, hədə və ya zorakılıq" maddəsi ilə ittiham irəli sürülüb, lakin sonradan onun işi "Məhkəmə prosesinə və ya istintaqa mane olmaq" maddəsi kimi yenidən təsnifləndirilib.

Telegramda izləyin