Bu kənddə "dua ilə axan" şəfalı bulaq suyu maraq doğurur - VİDEO

Kastamonunun Taşköprü rayonunun Kirazcık kəndi Ketenler məhəlləsində yerləşən və "Aksu" adlanan təbii bulaq suyu yerli sakinlərin və ziyarətçilərin diqqətini cəlb edir.

Sonxeber.az türk mediasına istinadən xəbər verir ki, inanclara görə, su yalnız dua edildikdən 15-20 dəqiqə sonra axmağa başlayır və təxminən yarım saat ərzində gur şəkildə axaraq daha sonra kəsilir.

Bulağın yanında qurulan xüsusi kabinlərdə insanlar su ilə yuyunaraq şəfa tapmağa çalışır. Ziyarətçilər həm içdikləri, həm də bədənlərini yuduqları suyun müxtəlif xəstəliklərə və ağrılara yaxşı təsir göstərdiyinə inanırlar.

Kirazcık kəndinin muxtarı Celal Kabaoğlu bildirib ki, su yalnız niyyət qəbul olunduqda axır: "Bura bizim məhəlləmizdə yerləşən müqəddəs sayılan bulaqdır. Dua ediləndən sonra su 20–30 dəqiqə axır, sonra isə quruyur. Hər kəs üçün axmır, kiminsə duası qəbul olunur, kiminsə isə yox. Su ilıq və şəfalıdır, istənilən şəxs əlini, ayağını yuyub, duş ala bilər" – deyə o qeyd edib.

Kabaoğlu həmçinin bildirib ki, bulaq sularını görmək üçün təkcə yerli sakinlər yox, Ankara, İstanbul və digər bölgələrdən də çox sayda insan gəlir. Onlar burada dua edib bulaqdan içir, suyun şəfasına inanırlar.

Telegramda izləyin