Avropada günəşin bir neçə ay batmadığı "o biri dünya" ADALARI

Orada gecə saat iki olarkən belə yürüşə çıxmaq mümkündür. Lofoten adaları tamamilə fərqli istirahət növü təqdim edir. Getdikcə daha çox insan tətil üçün "soyuq istirahəti" seçir və Norveçdəki Lofoten adaları bunun üçün ideal yerdir.

Lent.az bu adalarla bağlı məlumatları təqdim edir:

Qeyd olunur ki, əgər turistlər Norveçi maydan avqusta qədər ziyarət etsələr, onlar "gecəyarısı günəşi"ndən həzz ala bilərlər bu isə ölkəni gecə-gündüz kəşf etmək üçün nadir fürsətdir, çünki həmin dövrdə günəş heç vaxt batmır. Maraqlıdır ki, Lofoten adaları tamamilə fərqli istirahət təklif edir. Bu sərt arxipelaq dünyanın ən mənzərəli landşaftlarından bəzilərinə, həmçinin mütləq görülməli balıqçı kəndlərinə və insanı tamamilə öz içinə çəkən zəngin mədəni tarixə malikdir.

Macəra yaradıcısı və Much Better Adventures şirkətinin inkişaf üzrə baş meneceri Kris Kirni bu yaxınlarda hər şeyi öz gözləri ilə görmək üçün adalara səyahət edib. Səyahət o qədər möhtəşəm olub ki, çadır qurmaq, kayakla gəzinti və kəşflər arasında ən sevimli anını seçməkdə çətinlik çəkib. O deyib:

"Arktikada keçirdiyim, bir dənə də olsun gün batımı görmədiyim həftə ümumilikdə ən sürreal hadisə idi, ayrıca bir an deyildi. Bu qədər uzun müddət qaranlıq görməyəndə, hər şey qeyri-adi, mistik bir rəng alır".

Ən çox yadda qalan anı isə belə təsvir edib:

"Lofoten adalarından birində çadır qurduq, buludlar Valberq dağlarının zirvələri üzərində dolanırdı, uzaqda Festvoqtinden silueti görünürdü, başımızın üzərindən qartallar uçurdu və ətrafda sakit, möhtəşəm bir körfəz uzanırdı. Gecəyarısı günəşi bu yay tətilini daha da rahat və sakit etdi", - deyə Kirni bölüşüb.

Onun sözlərinə görə, bu səyahətdə zaman "daha axıcı şəkildə" keçirdi:

"Bu, bizim həyat tərzimizi tamamilə dəyişdi. İstəsəniz, gecə saat iki olarkən belə yürüşə çıxmaq mümkün idi. Günlər daha yavaş başlayırdı, çünki qısa işıqlı gündən maksimum yararlanmaq üçün tələsməyə ehtiyac yox idi, buna görə də düşərgədə istirahət etmək və ya səhər yeməyindən əvvəl sərin suda çimmək olardı".

Lofotenə getməyin ən sürətli yolu təyyarədir: əvvəlcə Osloya uçmaq, sonra daxili reyslə Budoya, oradan isə arxipelaqa uçmaq lazımdır. Adalara dəniz yolu ilə də getmək mümkündür. Hurtigruten, həm də Norwegian Coastal Express adı ilə tanınan Norveç kruiz, bərə və yükdaşıma şirkətidir və Norveç sahilləri boyunca daşımalar həyata keçirir. Gəmi Budodan sonra şimala gedərkən Lofoten adalarının Stamsunn limanına, daha sonra isə Svolvær şəhərinə çatır. Cənuba qayıdarkən də eyni marşrutdan keçir.

Telegramda izləyin