Balıqçı özü qarmağa düşdü - Qeyri-adi HADİSƏ

Qeyri-adi hadisə Krasnoyarsk diyarındakı su hövzələrindən birində balıq ovu zamanı baş verib. Rusiyanın Krasnoyarsk diyarında balıq ovu zamanı qeyri-adi hadisə yaşanıb.

Lent.az yerli mediaya istinadla bildirir ki, kişi qayıqda olarkən adəti üzrə yemli qarmağı ağzında saxlayıb.

Gözlənilmədən baş verən silkələnmə və ya güclü yellənmə nəticəsində kişi qeyri-ixtiyari udqunub kəskin sancı hiss edib. Məlum olub ki, balıqçılıq qarmağı onun boğazında ilişib qalıb.

Zərərçəkən dərhal öz təşəbbüsü ilə diyar xəstəxanasına müraciət edib. Qəbul şöbəsində həkimlər sürətlə müayinə aparıb və xəstəni rentgenə göndəriblər. Çəkilən rentgen şəklində yad cismin udlaq selikli qişasında ilişib qaldığı aydın görünüb.

Qarmağı çıxarmaq üçün həkimlər müasir və zərif bir üsuldan istifadə ediblər. Xüsusi elastik alət, endoskop vasitəsilə onlar yad cismi dəqiq və kəsik aparmadan çıxarmağa nail olublar. Prosedur uğurla başa çatıb, xəstə ciddi xəsarət almayıb.

Həkimlər qeyd edirlər ki, balıqçının qarmağı özü çıxarmağa cəhd etməməsi onun böyük şansı olub. Hazırda onun həyatına və sağlamlığına heç bir təhlükə yoxdur, artıq tibb müəssisəsindən evə buraxılıb.

Mütəxəssislər bir daha xatırladırlar ki, balıqçılıq alətlərini ağızda saxlamaq vərdişi təhlükəli nəticələrə səbəb ola bilər.

Telegramda izləyin