Evlənənlərin yaş fərqi: Qadın kişidən böyük olanda niyə qınanılır?

Evlənən cütlüklərin yaş fərqi həmişə müzakirə mövzusu olub. Bəzi ölkələrdə kişi və qadın arasındakı yaş fərqinin ailədaxili münasibətlərə təsir edəcəyi baxımından yolverilməz hesab edilir. Xüsusilə, qadının kişidən böyük olduğu hallar daha çox qınanılır. Azərbaycanda da bu belədir.

Bu barədə Bizim.Media-ya danışan psixoloq Gülnar Orucova deyib ki, son dönəmlər kişilərin özlərindən gənc xanımla evləndikləri hal çoxalıb:

"Artıq elə bir həddə çatıb ki, kişilər nəinki qızı, hətta nəvəsi yaşda bir xanımla evlənirlər.

Qadındansa bunu soruşanda məntiq evliliyi etdiyini, gələcəyini zəmanətə aldığını deyir. Çox qızlar var idi ki, xarici ölkəyə varlı kişinin arxasınca getdilər, amma sonra canlarını o insandan qurtarmaq üçün dövlətdən dəstək istədilər.

Ümumiyyətlə, pula görə hər hansı insanla, xüsusilə, yaşlı insanla ailə qurmaq olmaz. Bizim ataların bir sözü var: qocaya gedən quyruq yeyər, cavana gedən yumruq. Bu deyim qəbul olunmazdır".

O bildirib ki, qadın da kişidən, kişi də qadından böyük ola bilər:

"Bunların hər ikisinin arasında 5 yaş fərq ola bilər. Daha çox yaş həddi digər problemlərə yol aça bilər. Qadın həyat yoldaşınızdan 10-15 yaş böyük olursa, bu, qadının erkən qocalmasına gətirib çıxarır. Hardasa bir-biri ilə yola gedə bilirlər. Amma kişi qadından daha çox böyük olarsa, qadın xəyanətə daha çox meyilli olur. Çünki cinsi tələbatını müəyyən yaşdan sonra ödəmir və yaxud aşağı yaşda evlənir, böyüyür və hər şeyi dərk edəndə başqasını sevməyə başlayır.

Sovetlər dönəmində 10-12 yaş böyük olan insanlarla kişilər ailə həyatı qurardı. Amma indi kişilər özündən böyük biri ilə evlənəndə həmin paylaşıma gələn rəyləri oxuyanda dəhşətə gəlirəm. Yazırlar ki, qadının pulu var deyə, onunla evlənib, qadının üstünə hücum çəkirlər. Nə var ki o qadın özündən 12 yaş balaca oğlanla ailə qurub. Kişi özündən 12 yaş biri ilə ailə qura bilir, amma qadın 4-5 yaxud 15 yaş balaca biri ilə evlənə bilmir".

O, deyib ki, bəzi ailələrdə də uşaqları, gəncləri belə böyüdürlər:

"Amma bu doğru deyil. Sevgi yaşa baxmır, bəzən biz özümüzdən 5,8 yaş böyük birini sevə bilərik. Amma mən psixoloq olaraq məsələhət görərəm ki, arada yaş fərqi 5-i keçməsin. Çünki sonra qadın gənc qalır, kişi isə yaşlanır, qadın gəzmək, əylənmək istəyir, kişinin isə buna həvəsi olmur. Amma bu təbii ki, hər bir kəsə aid deyil. Elə şəxslər var ki, çox həvəslidi, özündən kiçik biri ilə ayaqlaşa da bilir. Yenə deyirəm ki, qız böyük olanda ayıb, etik olmayan sözlər yazırlar.

Amma cəmiyyət bunu normal qəbul eləməlidir. Kişi qadından böyük olduğu kimi qadın da kişidən böyük ola bilər".

Telegramda izləyin