Süni intellektlə bağlı qorxulu proqnoz: 100 milyon insan işini itirə bilər

ABŞ-də aparılan yeni araşdırma süni intellektin gələcəkdə əmək bazarına təsiri ilə bağlı narahatedici nəticələr ortaya qoyub.

Ölkə.az xəbər verir ki, Axios xəbər saytının məlumatına görə, ABŞ Konqresindəki Demokrat Partiya üzvləri "ChatGPT" əsaslı tədqiqat apararaq süni intellektin iş yerlərinə təsirini qiymətləndiriblər.

Araşdırmanın nəticələrinə əsasən, süni intellektin inkişafı yaxın 10 il ərzində ABŞ-də 100 milyondan çox insanın işini əvəzləyə bilər. Mütəxəssislər bildirirlər ki, bu proses həm ofis, həm də fiziki əmək işçilərini ciddi şəkildə təsirləndirəcək.

Demokratlar bu vəziyyəti tənqid edərək, süni intellektə edilən nəhəng investisiyaların təkcə səmərəliliyi artırmaq deyil, həm də əmək xərclərini azaltmaq məqsədi daşıdığını vurğulayıblar. Onların fikrincə, bu siyasət böyük şirkətlərin on minlərlə işçini ixtisar etməsi ilə nəticələnə bilər.

Tədqiqatı aparan senator Bernie Sanders "Fox News" telekanalına açıqlamasında deyib: "Bu multimilyarder şirkətlərin hazırladığı süni intellekt texnologiyaları milyonlarla insanın layiqli maaşlı işini əlindən ala bilər".

Digər tərəfdən, Respublikaçılar fərqli mövqe sərgiləyirlər. Onlar hesab edirlər ki, ABŞ süni intellekt sahəsində qlobal lider olmalı, bu texnologiyaya məhdudiyyətlər tətbiq etmək əvəzinə, onun inkişafını sürətləndirməlidir. Onların fikrincə, məhdudlaşdırıcı addımlar Çinin bu sahədə üstünlük qazanmasına şərait yarada bilər.

Telegramda izləyin