12 yaşlı məktəbli 5 minə yaxın fosillə muzey qurdu

Türkiyənin Karaman şəhərində yaşayan 12 yaşlı orta məktəb şagirdi Bahar Alimə Eren 6 yaşından etibarən ailəsi ilə birlikdə topladığı təxminən 5 minə yaxın fosillə öz kiçik fosil muzeyini yaradıb.

Sonxeber.az türk mediasına istinadən xəbər verir ki, 7-ci sinifdə oxuyan Bahar Alimə Eren son 6 il ərzində ailəsi ilə təbiət gəzintilərinə çıxaraq müxtəlif növ fosillər toplayıb. Onun topladığı nümunələrin bir hissəsi müxtəlif muzeylərə bağışlanıb, qalan hissəsi isə Karaman Elm və İncəsənət Mərkəzi (BİLSEM) daxilində, TEMA Fondunun dəstəyi ilə yaradılan Yasin Yıldırım Elm Muzeyində sərgilənməyə başlanıb.

Erenin fosilləri həmçinin "Kəşfin Əyləncəli Səyahəti-2" adlı TÜBİTAK 4007 Elm Festivalında da nümayiş etdirilib və böyük maraq doğurub.

Gənc tədqiqatçı muzey haqqında danışarkən belə deyib:

"Bu fosilləri Karamanın qədim daxili dənizindən tapdıq. Vaxtilə Karaman Xəzər dənizi kimi qapalı bir su hövzəsi olub və Konya ərazisinə qədər uzanırdı. Bu dənizdə çoxlu canlı növü yaşayırdı. Biz də Karamanın ekosistemini və biomüxtəlifliyini uşaqların daha yaxşı öyrənməsi üçün həmin dəniz canlılarının fosillərini topladıq"

Eren əlavə edib ki, topladıqları fosillərin bir hissəsini Hacettepe Universitetinin Biosfer Muzeyinə bağışlayıblar:

"Orada tələbələr bu fosilləri incələyərək ölkəmizin biomüxtəlifliyini, tarixini və təbiət sərvətlərini öyrənirlər. Hacettepedəki muzey Türkiyənin ən böyük məktəb muzeyi hesab olunur. Bizim Karaman BİLSEM-də yaratdığımız muzey isə biologiya sinfinin qarşısında yerləşir və endemik növlərlə yanaşı, qədim fosilləri də sərgiləyir."

Fosil marağının uşaqlıqdan başladığını deyən Bahar Alimə belə davam edib:

"6 yaşından bəri ailəmlə gəzintiyə çıxanda fosil toplayıram. Bu, həm səyahətləri maraqlı edib, həm də mənə çox şey öyrədib. İndi isə BİLSEM-dəki muzeyimiz sayəsində digər şagirdlər də bu fosilləri yaxından görüb öyrənmək imkanı tapır."

Ümumi istedad sahəsində təhsil alan gənc alim, elmi kəşflər etməkdən, araşdırmaqdan və bildiklərini paylaşmaqdan böyük zövq aldığını vurğulayıb.

Telegramda izləyin