"Google" şirkətinin ofisində taxtabiti təşvişi: İşçilər uzaqlaşdırıldılar

"Google" şirkətinin Nyu-York ofisinin əməkdaşları mümkün taxtabiti hücumu səbəbindən müvəqqəti olaraq məsafədən iş rejiminə keçiblər.

Oxu.Az bildirir ki, bu barədə "İndependent" nəşri məlumat verib.

Məlumata görə, şirkətin ekologiya, sağlamlığın mühafizəsi və təhlükəsizlik şöbəsinin məktubunda bildirilib ki, dezinfektorlar və xüsusi təlim keçmiş it böcəklərin mövcudluğuna dair inandırıcı əlamətlər aşkar edib.

Yoluxmanın Çelsi rayonunda yerləşən kampusdakı böyük yumşaq oyuncaqlardan qaynaqlandığı ehtimal edilir. Lakin hələ ki bununla bağlı rəsmi təsdiq yoxdur.

Məktubda işçilərdən xahiş edilib ki, binalar təmizlənib qurtarmayana qədər ofisə gəlməsinlər. Buna baxmayaraq, bəzi əməkdaşlar yenə də işə çıxıblar.

"Google" həmçinin ehtiyat tədbiri olaraq Nyu-Yorkun digər ərazilərində də əlavə yoxlamalara başlayıb. İşçilərdən həm ofisdə, həm də evdə istənilən dişləmə və ya taxtabiti əlamətləri barədə məlumat vermələri, lazım gələrsə, peşəkar dezinsektorlara müraciət etmələri xahiş edilib.

Mütəxəssislər qeyd edirlər ki, yataq taxtabitilərini məhv etmək olduqca çətindir. Böcəklər sürətlə çoxalır və adi insektisidlərə qarşı dayanıqlıdırlar. Onlar geyim, baqaj və şəxsi əşyalar vasitəsilə yayıla bilərlər ki, bu da hətta təmizlənmədən sonra belə təkrar infeksiya riskini artırır.

Qeyd edək ki, "Google" ofislərində oxşar insident 2010-cu ildə də baş vermişdi. O zaman Doqquzuncu avenyu küçəsindəki binada taxtabitiləri aşkarlanmışdı.

Telegramda izləyin