Məşhur milyonerin miras davası nəticələndi: 43 milyon sərvət xidmətçisinə qaldı

İngiltərədə "Qalereya Sahiblərinin Kralı" kimi tanınan iş adamı Richard Scott-un mirası ilə bağlı davam edən məhkəmə prosesi yekunlaşıb.

Sonxeber.az xarici mediaya istinadən xəbər verir ki, London Ali Məhkəməsi, Scott-un övladlarının iradəsini rədd edərək 43 milyon funt sterlinq (təxminən 1,6 milyard manat) dəyərindəki sərvətin həyat yoldaşı Jennifer Scott-a qalmasına qərar verib.

Richard Scott, Cheshire bölgəsində sahibi olduğu ikinci əl avtomobil bazarı ilə böyük sərvət qazanmışdı. 19 uşağın atası olan Scott, 1994-cü ildə öz malikanəsində xidmətçi kimi çalışan Jennifer ilə tanış olmuşdu. İllər sonra münasibətləri inkişaf edərək 2016-cı ildə evliliklə nəticələnmişdi.

Evlilikdən sonra Scott vasiyyətini yeniləyərək bütün mülkünü və təsərrüfatını Jennifer-in adına keçirmişdi. Bu qərar xüsusilə ailənin ən böyük oğlu Adam Scott-ın mirasdan tamamilə kənarda qalmasına səbəb olmuşdu.

Richard Scott 2018-ci ildə 81 yaşında vəfat etdikdən sonra Adam Scott məhkəməyə müraciət edərək vasiyyətnamənin ləğvini tələb edib. O, atasının həmin dövrdə demans səbəbindən sağlam düşüncə qabiliyyətini itirdiyini və qərarı şüurlu şəkildə verə bilmədiyini iddia edib.

Lakin məhkəmə Scott-un həm əvvəlki, həm də sonrakı vasiyyətlərinin hüquqi cəhətdən etibarlı olduğuna qərar verib. Hakim, iş adamının oğlunu mirasdan çıxarmaq qərarını "tam şüurlu və şəxsi iradəsi ilə" verdiyini vurğulayıb.

Beləliklə, Jennifer Scott bütün 43 milyon funtluq sərvətin yeganə sahibi olub. Bir zamanlar təmizlikçi kimi çalışdığı fermada, bu gün İngiltərənin ən çox diqqət çəkən həyat hekayələrindən birinin əsas fiquruna çevrilib.

Telegramda izləyin