Əhalisinin 92%-i müsəlman olan ölkədə məktəblərdə baş örtüyü qadağan edildi

Kosovada Ali Məhkəmə, Təhsil, Elm, Texnologiya və İnnovasiya Nazirliyinin (MASHTI) geyim qaydaları çərçivəsində baş örtüyünün istifadəsini qadağan edən qərarına qarşı açılan iddianı rədd edərək, Nazirliyin qərarını təsdiqləyib.

Sonxeber.az xarici mediaya istinadən xəbər verir ki, qadınların Peşəkar İnkişaf Şəbəkəsi (Arrita), dövlət təhsil müəssisələrində baş örtüyünün qadağan olunmasına qarşı açdığı iddianın əsassız olduğu qərarı verildiyini öyrənib.

Xüsusilə lisey tələbələrinin şikayətləri ilə bağlı Arrita, Nazirliyə qarşı Kosova Ali Məhkəməsinə müraciət edərək qadağanın ləğvini istəyib. İddia ərizəsində, son dörd ildə baş örtüyü istifadə etdikləri üçün məktəblərindən uzaqlaşdırılan və ya təhsilə maneçiliklə qarşılaşan bir çox qız tələbədən şikayət alındığı qeyd olunub.

Ali Məhkəmə qərarında, Nazirliyin tələbələrin geyim qaydalarını müəyyən etmək səlahiyyətinə malik olduğunu təsdiqləyərək, iddianın rədd edildiyini açıqlayıb. Qərarın əsaslandırılmasında isə Ali Məktəbəqədər Təhsil Qanunu və Peşə Təhsili və Tədris Qanununa istinad edilərək, tələbələrin davranış və geyimlərinə dair qaydaların müəyyən edilməsi üzrə açıq hüquqi səlahiyyətin mövcudluğu vurğulanıb.

Baş örtülü tələbələrin təhsil müəssisələrindən uzaqlaşdırılması 2010-cu ildən bəri Kosova üçün mübahisəli məsələlərdən biri olaraq qalır. 2010 və 2014-cü illərdə verilən inzibati göstərişlərlə dövlət qurumlarında baş örtüyü "dini uniforma" qadağası adı altında tətbiq olunmuşdu. Kosova İslam Birliyi həmin dövrdə qadağaya etiraz edərək, baş örtüsünün dini uniforma olmadığını və dini vəzifə olduğunu vurğulamışdı.

Telegramda izləyin