Rusiyada fabrikdə bütün işçilərin pulu bir nəfərin kartına köçürüldü

Rusiyada qəribə hadisə baş verib.

Oxu.Az Rusiya mətbuatına istinadən xəbər verir ki, fabrikdə çalışan bir fəhlənin kart hesabına səhvən 7 milyon 112 min rubl (təxminən 149 min manat) pul köçürülüb.

Məlum olub ki, bu məbləğ, əslində, eyni şirkətdə çalışan 34 işçinin ümumi maaşıdır.

Fabrikdə fəhlə işləyən şəxsin maaşı təxminən 46 000 rubl (təxminən 963 manat) olub. Lakin sistem xətası səbəbindən bütün ödənişlər onun hesabına köçürülüb. Şirkət səhvi aşkar etdikdən sonra işçidən pulu qaytarmağı tələb edib.

Lakin fəhlə bunun "texniki xəta" olduğunu bildirərək, pulu geri verməkdən boyun qaçırıb.

O, məhkəmədə özünü müdafiə edərək, "Əgər bu, mühasibat səhvi yox, texniki səhvdirsə, pul mənə məxsusdur. Mühasibat xətası olsaydı, qaytarardım" deyib.

Şirkətin hüquqşünasları məhkəmədə həmin pulun işçilərə məxsus olduğunu sübut ediblər. Həm birinci instansiya, həm də apellyasiya məhkəməsi işçinin əleyhinə qərar çıxarıb. Pulu qaytarmaq istəməyən rusiyalı fəhlə Rusiya Ali Məhkəməsinə müraciət edib.

Telegramda izləyin