Beyni olmadan doğuldu, artıq 20 yaşını qeyd edir

ABŞ-ın Nebraska ştatında demək olar ki, beyni olmadan doğulan Alex Simpson həkimlərin bütün proqnozlarını alt-üst edib. Doğulduğu zaman "5 yaşına belə çatmaz" deyilən Alex bu gün 20 yaşını qeyd edir.

Sonxeber.az xarici mediaya istinadən xəbər verir ki, doğulanda sağlam görünən Alexə iki ay sonra çox nadir rast gəlinən hidranensefaliya diaqnozu qoyulub. Həkimlərin sözlərinə görə, onun kəllə boşluğunda cəmi kiçik barmaq boyda beyin toxuması var idi.

Alexin atası Shavn Simpson yerli televiziya kanalına verdiyi müsahibədə bildirib:
"İyirmi il əvvəl çox qorxurduq. Amma inanc — düşünürəm ki, bizi yaşadan elə o idi".

Anası Lorena isə qızını "həqiqi döyüşçü" adlandırıb. Alexin 14 yaşlı qardaşı SJ də bacısı ilə qürur duyduğunu deyib:

"İnsanlar ailəmi soruşanda ağlıma ilk gələn ad mənim bacım Alex olur. Onun bacım olmasından fəxr duyuram".

Ailənin sözlərinə görə, Alexin görmə və eşitmə mərkəzləri inkişaf etməsə də, o, ətrafındakı insanların hisslərini dərk edə bilir.

Mütəxəssislər bildirirlər ki, hidranensefaliya hər 5–10 min hamiləlikdən birində müşahidə olunur və bu vəziyyət adətən uşağın həyatının ilk ilində ölümcül olur. Amma Alex Simpson bu nadir diaqnozla 20 il yaşayaraq həkimləri təəccübləndirib.

Telegramda izləyin