iPhone və Android istifadəçilərinin xarakter fərqləri - nələrdir?

Britaniyalı psixoloqlar maraqlı bir qanunauyğunluq aşkar ediblər: insanın smartfon seçimi onun xarakteri haqqında çox şey deyə bilər.

Lent.az-ın xarici KİV-ə istinadla xəbərinə görə, Linkoln Universitetində aparılan tədqiqat göstərib ki, Android istifadəçiləri orta hesabla daha mehriban, səmimi və təvazökar olurlar, iPhone sahibləri isə daha çox status və imicə diqqət yetirirlər.

Smartfon seçimi şəxsiyyətin güzgüsü

Araşdırmada iki qrup insan iPhone və Android istifadəçiləri şəxsi keyfiyyətləri və cihazlara münasibətləri barədə anketlər doldurublar.

iPhone istifadəçiləri telefonlarını status simvolu kimi qəbul edirlər, brendə və dizayna daha çox önəm verirlər;
Android istifadəçiləri isə telefonu praktik vasitə kimi görürlər əsas odur işləsin.

Fərqli xarakter xüsusiyyətləri

Tədqiqatçılar müəyyən ediblər ki, iPhone sahibləri adətən daha gənc, çox vaxt qadın və emosional olurlar. Lakin onların təvazökarlıq və səmimiyyət səviyyəsi bir qədər aşağı olur. Android istifadəçiləri isə daha çox yaşca böyük kişilərdir, statusa az önəm verirlər və maddi qazanc üçün aldatmağa meyilli deyillər.

Psixoloqların şərhi

Tədqiqat rəhbəri, psixoloq Xizer Şou qeyd edib ki, smartfonlar artıq insanın rəqəmsal güzgüsünə çevrilib. İnsanlar şüuraltı şəkildə daxili obrazlarına uyğun cihazları seçirlər. Yəni, sadə bir telefon seçimi belə insanın şəxsiyyəti barədə ipucu verə bilər.

Amma nəticələr mütləq deyil

Alimlər bildirirlər ki, bu fərqlər mütləq və universal göstərici deyil. Tədqiqatda cəmi 500 nəfər iştirak edib, buna görə nəticələr ümumi meyar kimi qəbul edilə bilməz.

Telegramda izləyin