Alimlər smartfonla Ayın şəklini çəkməyin niyə çətin olduğunu izah ediblər

Alimlər smartfonların Ayın fotoşəkillərini niyə keyfiyyətli çəkmədiklərini izah ediblər.

Oxu.Az xəbər verir ki, bu barədə "The Conversation" portalı məlumat yayıb.

Mütəxəssislərin sözlərinə görə, yeni başlayan astrofotoqrafların əsas səhvi Ayın qaranlıqda parladığını düşünmələridir. Əslində isə smartfonlar onun Günəş tərəfindən işıqlandırılan tərəfini, yəni parlaq gündüz işığında olan bir obyektin görüntüsünü çəkirlər.

Telefon kameraları avtomatik olaraq ekspozisiyanı qaranlıq səma əsasında tənzimlədiyi üçün nəticədə, Ay həddindən artıq işıqlı alınır və fotoda detalları görünməyən ağ ləkə kimi çıxır.

Mütəxəssislər Ayı gündüz, mavi səma fonunda çəkməyi tövsiyə edirlər. Bu halda kamera daha qısa ekspozisiya seçir və nəticə bir qədər real görünür.

Bununla belə, düzgün tənzimləmələrdən sonra da Ay fotoda çox kiçik qalır. Bu, smartfon kameralarının texniki quruluşu ilə bağlıdır. Müasir telefonlar adətən çox geniş baxış bucağına (təxminən 90 dərəcəyədək) malik olur, halbuki Ay səmada cəmi 0,5 dərəcə yer tutur.

Qısa fokus məsafəsi (cəmi bir neçə millimetr) səbəbindən Ayın təsviri fotoda təxminən 25 piksel enində görünür. Bu ölçü kraterləri və kölgələri seçmək üçün kifayət etmir. Rəqəmsal zum isə problemi həll etmir, çünki o yalnız şəkli böyüdür, real detalları isə artırmır.

Alimlər bildirirlər ki, Ayı bütün detalları ilə çəkmək üçün teleskop və ya optik zumlu kamera istifadə etmək lazımdır.

Telegramda izləyin