ABŞ-də 18 əyar qızıl unitaz 12,1 milyon dollara satıldı

Nyu-Yorkda keçirilən hərracda satışa çıxarılan 18 əyar qızıldan hazırlanmış unitaz rekord qiymətə — 12,1 milyon dollara alıcı tapıb.

Sonxeber.az xarici mediaya istinadən xəbər verir ki, İtalyan konseptual sənətçi Maurizio Cattelan tərəfindən hazırlanan və "Amerika" adı verilən 101 kiloqramlıq saf qızıl unitazı alan kolleksionerin kim olduğu açıqlanmayıb.

Cattelan hərracdan əvvəl bildirib ki, qızıl unitaz ABŞ-dakı həddindən artıq sərvət və sosial bərabərsizliyə satirik yanaşmanı əks etdirir. Sənətçi daha əvvəl verdiyi açıqlamada zarafatla belə demişdi:
"İstər 200 dollarlıq nahar edin, istər 2 dollarlıq hot-doq — nəticə tuvalet baxımından eynidir".

Bu əsər Cattelanın 2016-cı ildə yaratdığı iki qızıl unitazdan biri idi. Digər nümunə əvvəlcə Nyu-Yorkdakı Guggenheim Muzeyində sərgilənmiş, daha sonra Britaniyanın keçmiş baş naziri Uinston Çörçillin doğulduğu Blenheim Sarayına aparılmışdı. Lakin 2019-cu ildə sarayda sərgiləndiyi zaman oğurlanan qızıl unitaz bir daha tapılmayıb. Oğurluqla bağlı iki nəfər saxlanılsa da, ehtimal edilir ki, əsər parçalanaraq əridilib.

Telegramda izləyin