Dünyanın ilk məhbus pişiyi! Qonşunu canından bezdirdi, həbs edildi!

Fransanın cənubundakı Agd şəhərində yaşanan qeyri-adi məhkəmə işi ölkə gündəminin ən çox müzakirə olunan mövzularından birinə çevrilib.

Sonxeber.az xarici mediaya istinadən xəbər verir ki, qonşunun şikayəti əsasında məhkəməyə daşınan hadisədə "Remi" adlı sarman pişiyə rəsmi şəkildə "ev həbsi" cəzası verilib. Məhkəmə qərarına əsasən, pişiyin çölə çıxması qadağan edilib və bu qərar 90 səhifəlik əsaslandırma ilə elan olunub.

Şikayətin əsas səbəbləri arasında Reminin "qonşunun evinə girərək yorğanın üzərinə sidik etməsi, bağçaya nəcisləməsi və qurumamış suvağın üzərində pəncə izləri qoyması" kimi iddialar yer alıb. Lakin pişiyin sahibi Valdes bu ittihamları qəbul etmir: "Məhəllədə Remiyə bənzəyən başqa pişiklər də var. Fotolarda eyni bağçadan bir neçə fərqli pişiyin keçdiyi görünür. Bu qərar mənə real sübut olmadan verilmiş ağır bir hökm kimi gəlir", – deyə o bildirib.

O, indiyədək "bağça rahatlığını pozduğu" iddiası ilə qonşusuna ümumilikdə 2 min 50 avro təzminat ödədiyini də açıqlayıb.

Fransa Heyvanları Qoruma Dərnəyi isə qərarın narahatedici olduğunu bildirərək, bu cür işlərin artması halında pişiklərin sərbəst gəzişməsinin məhdudlaşdırıla biləcəyini vurğulayıb. Dərnək nümayəndələri "Bu gedişlə pişiklərə xalta taxılması belə gündəmə gələ bilər" xəbərdarlığını edib.

Bu qərarla Remi, dünyada məhkəmə qərarı ilə "ev həbsinə" məhkum edilən ilk pişik kimi tarixə düşüb.

Hadisə sosial mediada geniş müzakirələrə səbəb olub, heyvansevərlər isə Remiyə dəstək kampaniyası başlatmaq üçün hazırlıqlara başlayıblar.

Telegramda izləyin