1980-ci illərin ən sürətli avtomobili hansı idi?

1980-ci illərdə istehsal edilən bir çox kult avtomobilləri bu gün kolleksiyaçılar tərəfindən yüksək qiymətləndirilir. Onlar arasında elə idman modelləri var ki, xüsusiyyətləri bu gün də inanılmaz görünür.

Qaynarinfo xəbər verir ki, "SlashGear" nəşri həmin dövrün ən sürətli seriyalı avtomobilini xatırladıb. Bu model 300 km/saatdan artıq sürət yığa bilir və 0-100 km/saat sürətlənməsini 4 saniyədən az müddətdə tamamlayır.

Nəşr qeyd edib ki, 1980-ci illərin dünyada ən sürətli seriyalı avtomobili "Porsche 959"dur. Model 1986-1988-ci illərdə istehsal olunub.

"Porsche 959" markanın flaqman modeli idi və qabaqcıl tam ötürücülü sistem, üç rejimli yerdən yüksəkliyi tənzimlənən hidropnevmatik asqı və paralel-ardıcıl işləyən ikiqat turboyüksəldici kimi o dövr üçün müasir texnologiyalar təklif edirdi. Superkar həm də dövrünün ən bahalı avtomobillərindən biri idi - qiyməti 420.000 alman markası təşkil edirdi (inflyasiyaya uyğun olaraq təxminən 551.100 dollar).

"Car and Driver" jurnalının test sürüşü zamanı "Porsche 959" 0–60 mil/saat (96 km/saat) sürətini cəmi 3,6 saniyəyə əldə edib. Bu nəticəyə yalnız inkişaf etmiş tam ötürücülü sistem deyil, həm də 450 a.g. güc və 500 Nm fırlanma anı verən 2,8 litrlik oppozit altısilindrli mühərrik və 6-pilləli mexaniki transmissiya imkan yaradıb.

Modelin maksimal sürəti isə 315 km/saat idi ki, bu göstərici bu gün də yüksək sayılır. Bununla belə, sürət baxımından "Porsche 959"un ciddi bir rəqibi də var - "Ferrari F40".

"Ferrari F40" 1987–1992-ci illərdə istehsal olunub və 1980-ci illərin ən sürətli seriyalı avtomobillərindən biri hesab olunur. Model 2,9 litrlik turbomühərrikli V8 ilə təchiz olunub və 478 a.g. güc, 577 Nm fırlanma anı təqdim edir. Onun maksimal sürəti 324 km/saat idi və bu göstərici 1990-cı ilədək rekorda çevrilmişdi. Daha sonra bu nəticəni "Bugatti EB110" 342 km/saat sürətlə yeniləyib.

Telegramda izləyin