30 il əvvəl bir nəfər əkdi, indi yeyənlər həm şəfa tapır, həm də satır - VİDEO

Antalyanın Akseki rayonunda, Toros dağlarının daxili hissəsində yerləşən meşəlik ərazidə 25-30 il əvvəl kimliyi bilinməyən bir xeyriyyəçi tərəfindən əkilən yabanı yemişan ağacları bu gün də məhsul verir.

Sonxeber.az türk mediasına istinadən xəbər verir ki, region sakinlərinin "Beşbıyık" adlandırdığı, xalq arasında isə muşmula və ya yeni dünya kimi tanınan bu meyvələr təbii şəfa mənbəyi sayılır və Akseki bazarında 100-150 lirə arasında satılır.

Torosların yüksək hissələrinə həyat yoldaşı Mehmet Kara ilə birlikdə göbələk toplamağa gedən Fatma Kara, yabanı yemişan ağacında fərqli meyvələr gördüklərini deyərək təəccübləndiklərini bildirib. O, həmin ağacların nə bağda, nə də həyətdə deyil, çirklənmədən uzaq olan təbii dağlıq ərazidə yetişdiyini vurğulayıb. Daha sonra apardıqları araşdırma zamanı bu ağacların illər əvvəl bölgədə yaşayan bir xeyriyyəçi tərəfindən əkildiyini öyrəndiklərini deyib: "Kimin əkdiyini bilən yoxdur. Sağdırmı, ölübmü, heç kim bilmir. Allah razı olsun, əgər vəfat edibsə, məkanı cənnət olsun".

Kara ərazidə 30-40-a yaxın əkilən meyvə ağacının olduğunu qeyd edib və bölgədə yaşayan yörük və çobanların da bu meyvələrdən faydalandığını söyləyib: "İnsanlar faydalansın deyə əkildiyi bəllidir. Dadına baxdıq, çox gözəldir. Duyğulandıq, kaş hamı belə bir ağac əkib insanlar toplasın".

Yerli sakinlər dağın iç hissələrində illərdir heç kimə görünmədən yetişən bu meyvələrin arxasında kimliyi bilinməyən xeyriyyəçinin olduğunu bildirir və onun bu gün də xalqın duasını qazandığını deyirlər.

Telegramda izləyin