Dünyanın ən ölümcül dəniz canlılarından birinə toxunan turist təhlükənin son anda fərqinə vardı - VİDEO

Filippində istirahət edən ingilis turist ölümcül dəniz canlısı ilə təhlükəli təmas yaşadı

Filippində tətil edən Böyük Britaniya vətəndaşı Endi Makkonnell dünyanın ən ölümcül dəniz canlılarından biri hesab edilən mavi halqalı ahtapotla fərqində olmadan təmas edib.

Sonxeber.az xarici mediaya istinadən xəbər verir ki, turistin bu dəniz canlısını çimərlikdə əlinə alaraq çəkdiyi görüntülər sosial şəbəkələrdə qısa zamanda viral olub. Lakin sonradan məlum olub ki, bu qarşılaşma son dərəcə təhlükəli idi.

Məlumata görə, dayaz sularda rastlaşdığı və zərərsiz hesab etdiyi ahtapotu əlinə alan Makkonnell böyük risklə üz-üzə qalıb. Mütəxəssislər bildiriblər ki, söhbət mavi halqalı ahtapotdan gedir və bu canlının zəhəri siyanürdən təxminən 1000 dəfə daha ölümcüldür.

Turistin "Instagram" hesabında paylaşdığı videoda Filippinin dayaz sularında tapdığı kiçik ahtapotu əlinə alaraq görüntülədiyi görünür. Makkonnell canlını "gözəl" və "zərərsiz" kimi təqdim etsə də, izləyicilər və dəniz canlıları üzrə mütəxəssislər qısa zamanda bunun son dərəcə zəhərli mavi halqalı ahtapot olduğunu müəyyən ediblər.

Mütəxəssislərin sözlərinə görə, mavi halqalı ahtapotun zəhəri tetrodotoksin (TTX) maddəsi ehtiva edir. Bu güclü neyrotoksin insanın sinir sistemini iflic edərək tənəffüs çatışmazlığına səbəb ola bilər. Elmi məlumatlara əsasən, bu zəhər siyanürdən təxminən min dəfə daha güclü hesab olunur və vaxtında tibbi müdaxilə olmadıqda saniyələr ərzində ölümcül təsir göstərə bilər.

Videonun geniş yayılmasından sonra mütəxəssislər turistin təhlükənin ciddiliyindən xəbərsiz olduğunu bildiriblər. Makkonnell isə sonrakı paylaşımında yaşadıqlarını "ölümlə üz-üzə qalmaq" kimi dəyərləndirib və bu hadisənin onun üçün ciddi bir xəbərdarlıq olduğunu qeyd edib.

Dəniz bioloqları və təhlükəsizlik üzrə mütəxəssislər tətilçilərə xəbərdarlıq edərək bildiriblər ki, heç bir dəniz canlısına əl vurmaq olmaz. Onların sözlərinə görə, rəngarəng və diqqətçəkən canlılar xüsusilə təhlükəli ola bilər. Zəhərlənmə əlamətləri müşahidə edildiyi halda isə dərhal tibbi yardıma müraciət edilməlidir. Mütəxəssislər bu cür yanlış təmasların ağır və ölümcül nəticələr doğura biləcəyini bir daha vurğulayıblar.

Telegramda izləyin