Qayaların ortasında! 2 min illik monastırın son halı görənləri heyrətə gətirir - VİDEO

Türkiyənin Şırnak bölgəsində yüzlərlə il əvvəl inşa edilən və qayaların arasında yerləşdiyi üçün girişi olduqca çətin olan tarixi monastır görənləri heyrətə gətirir.

Sonxeber.az türk mediasına istinadən xəbər verir ki, Türkiyədə təhlükəsizlik şəraitinin yaxşılaşmasından sonra əvvəllər daxil olunması mümkün olmayan ərazilərə giriş təmin edilib və onlarla əsrlik monastır ilk dəfə dron vasitəsilə görüntülənib.

Sülh və təhlükəsizliyin bərqərar olduğu Bestlər Dərələr bölgəsində yerləşən kəndlərdən biri olan Kovankaya kəndi tarixi və təbii görkəmi ilə diqqət çəkir. Rayon mərkəzindən 40 kilometr uzaqlıqda yerləşən və vaxtilə boşaldılmış bu kənddə yay aylarında cəmi 3 ailə yaşayır. Beytüşşebap rayonuna bağlı Kovankaya kəndində təxminən 2 min il əvvəl inşa edildiyi ehtimal olunan iki nəhəng tarixi tikili ziyarətçilərdə böyük maraq doğurur.

Qayaların arasında salınmış monastıra demək olar ki, heç kəsin çatması mümkün deyil. Məlumata görə, indiyədək bu qədim məkanda 400 rahib təhsil alıb. Tarixi tikiliyə hazırda Keldani icmasının üzvləri dini ayinlər keçirmək üçün gəlirlər.

Kənddə tək yaşayan sakin Kemal Diril monastırla bağlı bildirib ki, tikili rəsmi mənbələrə görə təxminən 450 ildir mövcuddur, lakin rəvayətlərə əsasən onun 2 min il əvvəl inşa edildiyi deyilir. Onun sözlərinə görə, bu məkan Misirdə vəfat edən Martaj Maoni adına tikilmiş kilsə olub, sonradan monastıra çevrilib. Rəvayətlərə görə, burada 400 rahib təhsil alıb.

Kemal Diril əlavə edib ki, dövlət tərəfindən bölgədə təhlükəsizliyin təmin olunmasından sonra insanlar buraya maraq göstərməyə başlayıblar. O, yolların salınmasını və dövlət dəstəyinin artırılmasını istəyərək, "Buralar çox gözəl yerlərdir. Dövlətin təşviqi olsa, bölgə daha da inkişaf edə bilər", - deyə vurğulayıb.

Telegramda izləyin