Yolda tapdıqları qızıl dolu çantanı sahibinə qaytaran uşaqlara nazirdən mükafat! - VIDEO

İstanbulun Bağcılar rayonunda yolda tapılan və içində təxminən 1 milyon 300 min lirə dəyərində qızıl olan çanta, iki azyaşlının dürüst davranışı sayəsində sahibinə çatdırılıb.

Sonxeber.az türk mediasına istinadən xəbər verir ki, hadisə Kəmalpaşa məhəlləsində baş verib. Küçədə gəzərkən qızıl dolu çanta tapan 13 yaşlı Samir Hasanova və 12 yaşlı Selim Bayhan, çantanı özlərində saxlamayıb, yaxınlıqdakı bir esnafa təhvil veriblər. Esnaf çantanın içindən çıxan vizit kartı vasitəsilə qızılların alındığı zərgəri müəyyən edib. Daha sonra esnaf və uşaqlar birlikdə zərgərə gedərək qızılları sahibinə təhvil veriblər.

Uşaqların bu davranışı böyük təqdirlə qarşılanıb. Sənaye və Texnologiya naziri Mehmet Fatih Kacır, Bağcılar Bələdiyyə sədri Yasin Yıldız ilə birlikdə Samir Hasanova və Selim Bayhanı evlərində ziyarət edib. Nazir Kacır ziyarətlə bağlı görüntüləri sosial media hesabında paylaşaraq uşaqları və ailələrini təbrik edib.

Nazir paylaşımında bildirib:
"Sizi internetdə gördük. Təəssüf ki, adətən neqativ xəbərlər gündəm olur. Belə gözəl bir hadisənin baş verməsi və yayılması məni çox sevindirdi. Belə gənclərin olması ilə qürur duyduq. İnşallah, həyat boyu doğru və dürüst yoldan davam edərsiniz."

Məlumata görə, çantadakı qızılların dəyəri təxminən 1 milyon 300 min lirə olub. Qızılların sahibi də bu nümunəvi davranışa görə uşaqlara mükafat verib.

Ziyarətin sonunda nazir Samir Hasanova və Selim Bayhana noutbuk və TEKNOFEST gödəkçəsi hədiyyə edib. Uşaqların və esnafın çantanın sahibini tapmaq üçün zərgərə daxil olduğu anlar isə mağazanın təhlükəsizlik kameraları tərəfindən saniyə-saniyə qeydə alınıb.

Telegramda izləyin