Bir kəndin sakinlərini zəngin edən məhsul! Həkimlər, iş adamları bura axın edir - VİDEO

Bursanın İnegöl rayonunun kənd ərazisi olan Konurlar məhəlləsində təxminən 20 il əvvəl başlayan qoz istehsalı bu gün artıq Türkiyə miqyasında tanınan bir sahəyə çevrilib.

Sonxeber.az türk mediasına istinadən xəbər verir ki, qısa müddətdə böyük inkişaf göstərən qozçuluq həm bölgə iqtisadiyyatına ciddi töhfə verir, həm də gənclər üçün yeni məşğulluq imkanları yaradır.

Kənd təsərrüfatı istehsalında məhsul müxtəlifliyi və geniş əkin sahələri ilə seçilən İnegöldə qoz istehsalı son 15-20 ildə sürətlə artıb. Hazırda rayonda 30 min dekardan çox ərazidə qoz yetişdirilir. Bağların böyük hissəsi hələ tam məhsuldarlıq dövrünə çatmayan gənc bağlardan ibarətdir.

İnegöldə "Qoz kəndi" kimi tanınan Konurlar məhəlləsinin bələdiyyə sədri İlhami Uysal bildirib ki, əvvəllər kənd sakinləri əsasən tütünçülüklə dolanırdı. Onun sözlərinə görə, 20 il əvvəl bir nəfərin qoz bağı salması ilə bu sahənin əsası qoyulub və zamanla digərlərinə də nümunə olub.

Uysal qeyd edib ki, hazırda məhəllədə 3 min 500 dekar qoz bağı var:
"Bu sahənin 1 500 dekarı artıq suvarılır. Qalan hissə də mart ayında su ilə təmin ediləcək və bütün qoz bağları suvarıla bilən olacaq."

Muxtarın sözlərinə görə, Konurlarda 10 min tondan çox qoz istehsal olunur. Məhsul həm yaşıl qabıqlı, həm də taxta qabıqlı formada satılır və ölkənin dörd bir yanına, hətta xaricə ixrac edilir.
"Yığım oktyabrda başlayır və 15-20 gün davam edir. Noyabr-dekabr aylarında qoz tapmaq çətinləşir, demək olar ki, hamısı satılır. Qozumuz yağlı və ləzzətli olduğu üçün böyük maraq görür. Yeməklik qoz üçün bəzən 1-2 ay əvvəldən sifariş verilir."

Konurlar qoz bağları ilə tanındıqca investor marağı da artıb. İlhami Uysal bildirib ki, xüsusilə iş adamları və həkimlər qoz bağlarına sərmayə yatırırlar:
"Bursadan, İstanbuldan, hətta Trabzon və Ərzurumdan gəlib torpaq alanlar, boş sahədə sıfırdan bağ salanlar var. Bu gün torpağın bir dönümü 300-500 min lirə arasında satılır."

Qiymətlərə də toxunan Uysal deyib ki, ötən il yaşıl qabıqlı qozun kilosu 90-120 lirə aralığında satılıbsa, bu il qiymətlər 120 lirədən başlayaraq 150 lirəyə, taxta qabıqlı qoz isə 130-160 lirəyə qədər yüksəlib.
"Əgər tütündə qalsaydıq, bu qədər qazana bilməzdik. Tütündə pulu bir il gözləyirdik, qozda isə yığan kimi satır və qazancı dərhal əldə edirik."

Məhəllədə gənc qoz istehsalçılarından biri olan 20 yaşlı Mehmet Bali isə bu sahənin həm kənddən köçün qarşısını aldığını, həm də əksinə, geri köçü təşviq etdiyini bildirib. Onun sözlərinə görə, özlərinə məxsus 3 dönüm, icarə ilə isə 250 dönüm sahədə qoz istehsal edirlər:
"İnegöl mərkəzində mebel fabrikində qısa müddət işlədim, sonra buraya qayıtdım. Çiftçilik öz işimizdir, ən azından qazancımız var. Bu il bir çox kənd təsərrüfatı məhsulunda itki olsa da, biz qozdan yaxşı gəlir əldə etdik."

Konurlar məhəlləsi bu gün qoz bağları və yüksək keyfiyyətli məhsulu ilə bölgənin ən uğurlu kənd təsərrüfatı nümunələrindən biri kimi göstərilir.

Telegramda izləyin