Pişik marketin soyuducusuna girib ətləri yedi! - VİDEO

Türkiyənin ən böyük şəbəkə marketlərindən birinin İstanbulun Beylikdüzü rayonundakı filialında çəkildiyi iddia edilən görüntülər sosial mediada geniş rezonans doğurub.

Sonxeber.az türk mediasına istinadən xəbər verir ki, paylaşılan videoda bir pişiyin toyuq və ət məhsullarının saxlandığı soyuducu dolaba girərək məhsullarla təmasda olduğu, hətta bəzilərini yediyi anlar əks olunub.

Sosial şəbəkələrdə sürətlə yayılan görüntülərdə pişiyin marketdə çiy toyuq və ət məhsullarının yerləşdiyi stenddəki soyuducuya daxil olduğu, qablaşdırılmış məhsullara toxunduğu açıq şəkildə görünür. Kadrlərin Beylikdüzü rayonundakı bir filialda çəkildiyi irəli sürülür.

Görüntülərin yayılmasından sonra çoxsaylı istifadəçi xüsusilə ictimai sağlamlığa birbaşa təsir edən ət və toyuq məhsullarında gigiyena qaydalarının pozulduğunu bildirərək vəziyyətə etiraz edib. Nəzarət mexanizmlərinin yetərsizliyi və market əməkdaşlarının məsuliyyəti də müzakirə mövzusuna çevrilib.

Hadisə ilə bağlı şəbəkə market rəhbərliyi və ya aidiyyəti qurumlar tərəfindən hələlik rəsmi açıqlama verilməyib. Görüntülərdən sonra hər hansı inzibati araşdırmanın aparılıb-aparılmadığı isə hələ də qeyri-müəyyən olaraq qalır.

Telegramda izləyin