Kapron kolqotkalar tez-tez cırılırsa nə etməli?

Bunun üçün kolqotkalarınızı daha möhkəm edəcək cəmi bir addım atmaq kifayətdir. Bir çox qadın kolqotkaların çox tez cırılması problemi ilə üzləşir.

Lent.az xəbər verir ki, kapron kolqotkalar elastiklik və bədənə sıx oturması üçün neylon və poliester kimi yüksək elastik materiallardan hazırlanır. Bu materiallar təbiət etibarilə zərif olduğundan, hətta kiçik ilişmə və ya həddindən artıq dartılma belə kolqotkanın zədələnməsinə səbəb ola bilər.

Xüsusilə Lydia Altman TikTok hesabında yeni kolqotkaları daha uzun müddət geyinməyə kömək edən və onların cırılmasının qarşısını alan sevimli üsulunu paylaşıb.

"Əgər mənim kimi sizin də yeni kolqotkalarınız beş dəqiqə keçməmiş cırılır, qaçıq düşür və ya başqa problem yaranırsa, bu həyat hiyləsi sizə kömək edəcək", - deyə o bildirib. Onun sözlərinə görə, edilməli olan yeganə şey kolqotkaları soyuq su ilə yumaqdır.

"Bilirəm, indi düşünürsünüz: "Aman Allahım, amma bir az səbirli olun", - deyə Lydia əlavə edib.

Kolqotkaları soyuq su ilə yuduqdan sonra artıq suyu ehtiyatla sıxmaq lazımdır. Mütəxəssisin sözlərinə görə, növbəti mərhələyə keçərkən kolqotkalar bir qədər nəm olmalıdır, amma islanmış halda yox.

Daha sonra onları kilidli paketə və ya başqa hermetik torbaya qoyub 24 saat müddətinə dondurucuya yerləşdirmək lazımdır.

"24 saatdan sonra onları çıxarırsınız və bu, kolqotkaların möhkəmliyini sözün əsl mənasında artırır, istifadə müddətini uzadır və pulunuza qənaət etməyə imkan verir", - deyə Lydia vurğulayıb.

Sonra kolqotkaları geyinmədən bir neçə saat əvvəl çıxarın ki, ərisin və otaq temperaturuna çatsın. Kolqotkaların dondurulması onların istifadə müddətini necə uzadır?

Geyim əşyasını geyinməzdən əvvəl dondurucuya qoymaq qəribə səslənsə də, mütəxəssislər bunun kolqotkaları daha möhkəm etməsinin elmi izahının olduğunu bildirirlər.

"Kolqotkaların dondurulması liflər arasındakı bağları sıxlaşdıraraq onları müvəqqəti olaraq möhkəmləndirə bilər. Bu proses liflərin güclənməsinə və qaçıq düşmə riskinin azalmasına kömək edir", - deyə geyim brendi Cliftonun təsisçisi və əməliyyat direktoru Saymon Elliot bildirib. Mütəxəssislər kolqotkaları geyinməzdən əvvəl ayaqlara nəmləndirici krem çəkməyi məsləhət görürlər, çünki bu, onların daha rahat geyinilməsinə kömək edir.

Elliot həm geyinmə, həm də çıxarma zamanı kolqotkalara maksimum diqqətlə yanaşmağı tövsiyə edir. O, həmçinin kolqotkaları yuyarkən xüsusi torlu yuma kisəsinə qoymağı məsləhət görür. Bu, onların digər geyimlərin düymə və ya fermuarlarına ilişərək zədələnməsinin qarşısını alır.

Telegramda izləyin