Dünyanı su basacaq demişdi, həbs olundu

Bir müddət əvvəl dekabrın 25-də dünyanı su basacağını iddia edən və özünü Ebo "Nuh" adlandıran kişi Qanada saxlanılıb.

Axşam.az xəbər verir ki, bu barədə "News Ghana" məlumat yayıb.

Bildirilir ki, əsl adı Evans Eşun olan şəxsə qarşı yalan məlumat yaymaq və ictimaiyyəti qəsdən çaşdırmaq ittihamı irəli sürülüb. Məhkəmənin qərarı ilə o, iki həftəlik həbs edilib və barəsində psixiatrik ekspertiza təyin olunub.

Polisin bildirdiyinə görə, Eşun internetdə diqqət çəkmək məqsədilə hərəkət etdiyini etiraf edib və əməlindən peşman olduğunu bildirib. Hüquq-mühafizə orqanları qeyd ediblər ki, təqsirləndirilən şəxs özəl məktəbdə mühafizəçi işləyir və sosial şəbəkələrdə yaratdığı imicə baxmayaraq, dini təhsili yoxdur.

Qeyd edək ki, Evans dünyanı su basacaq iddiası ilə səkkiz nəhəng taxta gəmi inşa etməyə başlamış və bu məqsədlə ona inanmış şəxslərdən ianələr toplamışdı. Lakin 25 dekabr ərəfəsində isə "peyğəmbər" apokalipsisin təxirə salındığını açıqlamışdı. O, əlavə gəmilərin inşası üçün Allahın insanlara əlavə vaxt verdiyini bildirmişdi.

Telegramda izləyin