Bu "iPhone"ların batareyaları uçuş zamanı şişir

Son zamanlar bəzi "iPhone" istifadəçiləri batareyaların uçuşlar zamanı şişdiyini, lakin enişdən sonra problemin öz-özünə həll olunduğunu bildirirlər.

"Qafqazinfo" xarici mətbuata istinadən xəbər verir ki, xüsusilə "iPhone 16 Pro Max" və "iPhone 15" kimi yeni modellərin sahibləri uçuşlar zamanı telefonlarının arxa panelinin çərçivədən ayrıldığını deyir.

İstifadəçilər təyyarə havada olarkən batareyaların şişdiyini, lakin cihazın fiziki olaraq enişdən sonra normal vəziyyətinə qayıtdığını qeyd edir.
Mütəxəssislər litium batareyalarının zamanla qaz istehsal edə biləcəyini və bu qazın normal yer təzyiqində sıxıldığını söyləyirlər. Təyyarə salonundakı təzyiq azaldıqca bu qazın genişləndiyi və batareyanın müvəqqəti olaraq şişməsinə səbəb olduğu düşünülür. Bildirilir ki, enişdən sonra şişkinlik yox olsa belə, batareyanın genişlənməsi daxili möhürlərə zərər verə, telefonun su və toza qarşı müqavimətini poza bilər.

Ən önəmlisi isə zədələnmiş batareya həddindən artıq isinmə və yanğın riskini artırır. Uçuş zamanı belə vəziyyətlə qarşılaşan sərnişinlərə dərhal heyətə məlumat vermələri və təhlükəsiz olduğu təqdirdə cihazın şəklini çəkmələri tövsiyə olunur.

Telegramda izləyin