Mətbəx çanaqlarındakı boruların tutulmasının SƏBƏBİ

Mütəxəssislər bu vərdişin nə kimi fəsadlar törədə biləcəyini izah ediblər.

2026-cı Yeni ili qeyd edəcək hər bir insan sərxoş olmamaq və bayram gecəsini normal keçirmək üçün alkoqolu nə ilə yeməyin vacib olduğunu bilməlidir. Lakin şənlik bitdikdən sonra süfrəni yığışdırmaq lazım gəlir və bir çox evdar qadın badələri boşaldarkən alkoqolu çanağa tökməyin mümkün olub-olmadığını düşünür. Əslində isə bu, ciddi problemlərə səbəb ola bilər.

Lent.az xarici mediaya istinadən xəbər verir ki, boru və drenaj sistemləri üzrə mütəxəssis, Swiftdrain şirkətinin sahibi Ankit Sehqal alkoqolun borulara zərər verib-vermədiyini izah edib. Onun sözlərinə görə, Miladla Yeni il arasındakı dövrdə insanlar ən çox boruların açılması üçün ustalara müraciət edirlər. Bu təcili çağırışların əsas səbəbi tullantıların düzgün atılmaması, xüsusilə də alkoqolun çanağa tökülməsi vərdişidir.

O, tutulmaların ən çox rast gəlinən səbəblərindən biri kimi Baileys kimi qaymaqlı likörləri, həmçinin yumurta əsaslı Advocaat içkisini qeyd edib. Bundan əlavə, borularda tez-tez sous, yağ və qida qalıqlarına da rast gəlinir. Sehqalın sözlərinə görə, insanlar maye konsistensiyalı hər şeyin rahatlıqla çanağa tökülə biləcəyini düşünürlər, lakin santexnika sistemi bu cür işləmir. "Qaymaq əsaslı içkilər və kulinariya yağları borulara düşdükdə tamamilə fərqli davranır. Onlar soyuyur, boruların divarlarına yapışır və zamanla yığılıb tutulma yaradır", - mütəxəssis bildirib.

O izah edib ki, tərkibində süd məhsulları olan içkilər santexnika sahəsində FOG (yağlar, yağlı maddələr və sürtkülər) kimi tanınan kateqoriyaya daxildir.

Bu maddələr sadəcə su ilə yuyulub getmir, boruların divarlarına yapışaraq tədricən diametri daraldır və nəticədə suyun sərbəst axını mümkünsüz olur. Bayram dövründə problem daha da kəskinləşir, çünki eyni vaxtda çoxlu miqdarda təhlükəli mayelər - qaymaqlı içkilər, yağlar, souslar, əridilmiş kərə yağı və ət şirələri atılır. Qısa müddətdə böyük həcmdə tullantının çanağa tökülməsi vəziyyəti daha da ağırlaşdırır.

Mütəxəssisin sözlərinə görə, bu tullantılar ayrı-ayrılıqda problem yaratmaya bilər, lakin birlikdə olduqda çox vaxt santexnik çağırılmasına səbəb olur.

Telegramda izləyin