Pişiklər necə "təşəkkür edir?"

Baytarlar pişiklərin hansı davranışları ilə sahiblərinə minnətdarlıq və sevgilərini ifadə etdiklərini izah ediblər. Pişiklər hisslərini sevgi, təşəkkür və bağlılığı hər zaman dərhal fərq etmədiyimiz incə üsullarla göstərməyi bacarırlar.

Lent.az pişiklərlə bağlı maraqlı faktları təqdim edir:

Hədiyyə gətirirlər

Pişiklər bəzən sahiblərinə öz "xəzinələrini" oyuncaqlarını və ya hətta ovladıqları heyvanları gətirirlər. Doktor Hantın sözlərinə görə, bu davranış bağlılığın ifadəsi ola bilər və ya ana pişiyin balalarına ov etməyi öyrətməsini xatırladan instinktiv hərəkətdir.

Evdə sizi izləyirlər

Əgər pişiyiniz daim arxanızca gəzirsə, bu, sizinlə ünsiyyəti qiymətləndirdiyini və yanınızda olmaq istədiyini göstərir. Hant qeyd edir ki, bu davranış bir növ komplimentdir və pişiyin sizinlə vaxt keçirməkdən məmnun olduğunu göstərir.

Başını sizə sürtür

Pişik əllərinizə, ayaqlarınıza və ya bədəninizə üzünü sürtəndə öz qoxusunu buraxaraq sizi "özününkü" kimi işarələyir. Bu, onun sizə güvəndiyini və yanınızda özünü rahat hiss etdiyini göstərir.

Yavaş-yavaş gözlərini qırpır

Yavaş göz qırpma pişiklərdə bir növ "öpüş" və ya salamlaşma jesti hesab olunur. Hant məsləhət görür ki, siz də eyni şəkildə cavab verəsiniz bu, aranızdakı bağı və qarşılıqlı etibarı gücləndirir.

Üzərinizdə və ya yanınızda yatır

Əgər pişik çiyninizdə, qucağınızda və ya sadəcə yanınızda yatmağı seçirsə, bu, onun özünü təhlükəsiz hiss etdiyini və sizə qarşı sevgi göstərdiyini bildirir.

Pəncələri ilə "yoğur"

Bu davranış pişik balalığı dövründən gəlir. Balalar analarının südünün gəlməsini stimullaşdırmaq üçün pəncələri ilə yoğururlar. Yetkin pişiklərdə isə bu, məmnunluq, güvən və sakitliyin əlamətidir.

Sizi evdə sevinclə qarşılayırlar

Qapıda qarşılamaq pişiyin sizin qayıdışınıza sevindiyini göstərən sadə bir üsuldur. Bəzən pişiklər arxası üstə uzanaraq qarınlarını göstərirlər ki, bu da yüksək etibar əlamətidir, çünki bu vəziyyətdə onlar daha həssas olurlar.

Yalama

Pişiklərdə bir-birini və ya sahiblərini yalamaq qayğı və valideyn bağlılığı ilə əlaqəlidir. Evdə güclü emosional bağ qurmuş pişiklər sahiblərini yalayaraq sevgilərini və bağlılıqlarını ifadə edə bilərlər.

Telegramda izləyin