Həkim qastrit diaqnozu ilə bağlı məşhur mifi təkzib etdi

"Xroniki qastrit diaqnozunun yalnız mədə mukozasının - yəni mədənin daxili səthini örtən və onu güclü turşu ilə həzm fermentlərinin təsirindən qoruyan qoruyucu təbəqənin müayinəsi əsasında qoyula biləcəyi fikri mifdir".

Oxu.Az xəbər verir ki, bunu Rusiya mətbuatına açıqlamasında qastroenteroloq Aleksandra Metelina deyib.

Onun sözlərinə görə, dəqiq diaqnoz üçün mütləq biopsiya aparılmalıdır, əks halda nəticələr qeyri-dəqiq olur: "Xroniki qastrit diaqnozu yalnız gözlə və ya qastroskopiya görüntüsünə əsaslanaraq qoyula bilməz. Mədə mukozasında müşahidə olunan qızartı və iltihab çox vaxt insanlarda əsassız qorxu yaradır, lazımsız dərman qəbuluna və sərt pəhrizlərə səbəb olur".

Rusiyalı mütəxəssis bildirib ki, qastroskopiya selikli qişanın rəngi və eroziyaların olub-olmaması barədə vacib məlumatlar verir. Lakin bu, diaqnoz qoymaq üçün kifayət deyil.

"Qastritin təsdiqlənməsi üçün iltihabın və atrofiyanın dəqiq müəyyən edilməsi vacibdir. Qızartı və ya tək-tük eroziya kimi yüngül əlamətlər əksər hallarda qastritdən çox funksional dispepsiyanı və ya qida reaksiyasını göstərir. Biopsiya aparılmadıqda diaqnoz qeyri-müəyyən qalır. Bu yanaşma antibiotiklərin və mədə turşuluğunu azaldan dərmanların lazımsız istifadəsinin qarşısını almağa kömək edir", - deyə o bildirib.

Telegramda izləyin