Alimlər "zombi ağacı"nı dəhşətli xəstəlikdən xilas etməyə çalışır

2010-cu ildə Avstraliyada ilk dəfə parlaq sarı göbələk xəstəliyi - mirta pası aşkarlanmışdı. Bu xəstəlik mirta ailəsinə aid ağac və kol bitkilərini məhv edir. Yeni tədqiqat "zombi ağacı"nın bu xəstəlik səbəbindən yox olmaq təhlükəsi altında olduğunu göstərir. Hətta artıq qiymətləndirilmiş ağacların 10 faizi ölüb, qalanlar isə mirta pası səbəbindən çiçəkləməyib və meyvə verməyib.

Qaynarinfo xəbər verir ki, bu barədə "Austral Ecology" yazıb.

Alimlər bildirirlər ki, yalnız "zombi ağacı" deyil, ümumilikdə 17 növ mirta ailəsinə aid bitki növü bir nəsil ərzində yox ola bilər, çünki onların heç biri mirta pasına qarşı dayanıqlı deyil.

Ümid isə hələ var. Kvinslend Universitetindən Rod Fenshem deyir ki, Rhodamnianın digər yaxın qohum növləri genetik baxımdan müəyyən dərəcədə dayanıqlılıq göstərir. Strateji olaraq, vəhşi təbiətdə xəstəliyə yoluxmamış təmiz gövdələr seçilərək təhlükəsiz ərazilərdə çoxaldılır. Hazırda Lismur və Taunsvill şəhərlərində yetişdirilən fidanlar ümidvericidir, lakin onların davamlı müşahidəsi tələb olunur. Məqsəd növbəti nəsildə Rhodamnia zombi-də müəyyən müqavimətin meydana çıxmasıdır.

Əgər uğur əldə olunarsa, alimlər dayanıqlı nümunələri yenidən Kvinslend tropik meşələrinə əkməyi planlaşdırır. Fenshem deyir: "Bu, qeyri-mümkün və cəsarətli görünə bilər, amma növün mirta pasının daimi təsirindən qorunmaq və müəyyən müqavimət nümayiş etdirmək üçün zamana və sahəyə ehtiyacı var. Təbiətdə tək buraxılsa, ağaclar həqiqi "zombi"lərə çevriləcək".

Telegramda izləyin