Bacısının ərini 8 güllə ilə öldürdü

Bursada 25 yaşlı gənc ailədaxili səbəblərə görə mübahisə etdiyi yeznəsini tapança ilə güllələyərək öldürüb.

Sonxeber.az türk mediasına istinadən xəbər verir ki, hadisə saat 11:00 radələrində Yıldırım rayonunun Fidyekızık məhəlləsində baş verib. Məlumata görə, Fırat Ç. (25) küçədə bacısının həyat yoldaşı Alperen Şahin (30) ilə qarşılaşıb.

İddiaya əsasən, ailə məsələləri üstündə tərəflər arasında mübahisə yaranıb. Bu zaman Fırat Ç. üzərində olan tapança ilə yeznəsinə atəş açıb. Şahinə 8 güllə dəyib. Hadisə barədə məlumat verildikdən sonra əraziyə polis və təcili tibbi yardım briqadaları cəlb olunub.

Ağır yaralanan Alperen Şahin ilkin tibbi yardım göstərildikdən sonra Bursa Yüksək İxtisas Təhsil və Araşdırma Xəstəxanasına çatdırılıb. Həkimlərin səylərinə baxmayaraq, onun həyatını xilas etmək mümkün olmayıb.

Hadisəni törətməkdə şübhəli bilinən Fırat Ç. polis əməkdaşları tərəfindən saxlanılıb. Faktla bağlı istintaq tədbirləri davam etdirilir.

Telegramda izləyin