İlk görüşdən sonra tanış olduğu kişiyə 159 min mesaj göndərən qadın həbs edilib

ABŞ-ın Arizona ştatında yaşayan Jaklin Kler Ades tanışlıq saytında tanış olduğu kişiyə cəmi bir görüşdən sonra 159 mindən çox mesaj və ağır təhdidlər göndərdiyi üçün həbs olunub.

Sonxeber.az xarici mediaya istinadən xəbər verir ki, 31 yaşlı qadının hərəkətləri hüquq-mühafizə orqanları tərəfindən "müasir dövrün ən qorxunc təqib hadisələrindən biri" kimi qiymətləndirilir.

Ades ötən ilin may ayında Paradise Valley polisi tərəfindən kişinin evinə zorla daxil olmaq və onu narahat etmək ittihamları ilə saxlanılmışdı. İlkin mərhələdə göndərilən mesajların sayının 65 min olduğu bildirilsə də, sonradan açıqlanan rəsmi polis sənədləri bu rəqəmin 159 mindən çox olduğunu ortaya qoyub.

"Arizona Republic" qəzetinin əldə etdiyi sənədlərə əsasən, Ades 2017-ci ildə həmin şəxsin mülkündən uzaqlaşdırıldıqdan sonra göndərdiyi mesajlar daha da təhlükəli və zorakı məzmun alıb. İddialara görə, o, zərərçəkmiş şəxsə son dərəcə qorxunc ifadələr yer alan mesajlar yazıb və ona qarşı fiziki zorakılıq fantaziyalarını dilə gətirib.

Hadisənin tarixi 2017-ci ilin iyul ayına qədər uzanır. Polis qeydlərinə görə, 2018-ci ilin aprelində hüquq-mühafizə orqanları Adesi kişinin evində vanna qəbul edərkən aşkar edərək qanunsuz daxil olma maddəsi ilə saxlayıb. May ayında azadlığa buraxıldıqdan sonra isə qadın həmin şəxsin iş yerinə gedərək özünü onun "həyat yoldaşı" kimi təqdim edib və yenidən həbs olunub.

Ades həbsxanada verdiyi müsahibədə zərərçəkmiş şəxslə varlı insanlar üçün nəzərdə tutulmuş Luxy adlı tanışlıq platforması vasitəsilə tanış olduğunu bildirib. O, özünü müdafiə edərək "Sanki ruh əkizimi tapmışdım" deyib və münasibətin normal davam edəcəyini düşündüyünü söyləyib.

Hazırda Marikopa dairə həbsxanasında saxlanılan Ades ona qarşı irəli sürülən təqib və qanunsuz daxil olma ittihamlarını qəbul etmir. İş üzrə araşdırmalar davam edir.

Telegramda izləyin