10 yaşlı uşaq məktəbdə bayrağa görə döyülüb? - VİDEO

İstanbulun Küçükçekmece rayonunda orta məktəb şagirdinin məktəbdə zorakılığa məruz qaldığı iddia olunur.

Sonxeber.az türk mediasına istinadən xəbər verir ki, hadisə Kadriye Moroğlu adına orta məktəbdə baş verib. Bildirilir ki, 10 yaşlı şagird M.E.D. sinif otağında yerdə gördüyü Türkiyə bayrağını götürərək pəncərənin kənarına qoyub. İddialara əsasən, bayraq küləyin təsiri ilə pəncərədən aşağı düşüb.

Bu zaman sinfə daxil olan qadın əməkdaşın şagirdi boğazından sıxaraq yerə doğru itələdiyi iddia edilir. Uşağın qorxduğu üçün hadisə barədə əvvəlcə ailəsinə məlumat vermədiyi, vəziyyətin digər şagirdlər vasitəsilə valideynlərə çatdırıldığı bildirilir.

Şagirdin atası Saruhan D. övladının boğaz nahiyəsində göyərmələr gördükdən sonra onu xəstəxanaya apardığını və tibbi ekspertiza rəyi aldığını deyib. Ailə qadın əməkdaş barəsində prokurorluğa şikayət edib.

Hadisə ilə bağlı araşdırma aparıldığı bildirilir.

Telegramda izləyin