Tək bir kofe sifarişi ilə dünyanın ən zəngin qadını oldu

Böyük Britaniyada maraqlı və bir qədər də ironik hadisə baş verib.

Sonxeber.az xarici mediaya istinadən xəbər verir ki, bir qadın kafedən kofe sifariş etdikdən sonra təqdim olunan çekə baxarkən gözlərinə inanmayıb. Çekdə ona 63 katrilyon funt-sterlin məbləğində hədiyyə çeki tanımlandığı göstərilib.

Məlumata görə, hadisə texniki nasazlıq nəticəsində baş verib. Kafe rəhbərliyi açıqlamasında bildirib ki, sistemdə yaranan inzibati səhv səbəbindən çekdə real olmayan, astronomik rəqəm əks olunub. Səhv qısa müddət ərzində aşkar edilərək aradan qaldırılıb.

Hadisəni yumorla qarşılayan qadın isə vəziyyətə zarafatla yanaşıb. O bildirib ki, bu məbləği görəndə xeyli əylənib və "Kağız üzərində dünyanın ən zəngin qadını olmağın zövqünü yaşayıram" deyə fikrini bölüşüb.

Qısa müddət ərzində sosial şəbəkələrdə yayılan hadisə istifadəçilərin marağına səbəb olub. Reallıqdan uzaq olsa da, dünya iqtisadiyyatının ümumi həcmini belə üstələyən məbləğ bir texniki səhvin hansı absurd nəticələrə gətirib çıxara biləcəyini bir daha göstərib.

Telegramda izləyin