Qonşular azyaşlının ağlamaq səsinə görə evlərinə hücum edib uşağın başını yardılar - VİDEO

Yalovanın Çınarcık rayonunda qonşular arasında "uşaq səsi" üstündə yaranan mübahisə ağır zorakılıq hadisəsinə çevrilib.

Sonxeber.az türk mediasına istinadən xəbər verir ki, 34 yaşlı Muhammed Baca və qucağındakı 14 aylıq qızı İkra qonşularının dəyənəklə hücumuna məruz qalıb. Nəticədə atanın burnu sınıb, azyaşlının isə kəllə sümüyündə çat əmələ gəlib.

Hadisə Çınarcık rayonunun Esenköy qəsəbəsində baş verib. Məlumata görə, Baca ailəsi təxminən bir il əvvəl 4 övladı ilə birlikdə yeni aldıqları evə köçüb. Eyni binada yaşayan digər ailə ilə uşaqların ağlamaq səsinə görə tez-tez mübahisələr yaşanıb. Bildirilir ki, tərəflər arasındakı gərginlik zaman-zaman təhdid həddinə qədər yüksəlib.

Son olaraq fevralın 20-də baş verən insident zamanı Muhammed Baca 14 aylıq qızı İkranı qucağında saxladığı anda Şener E. adlı şəxs tərəfindən dəyənəklə vurulduğu iddia edilir. Hücum nəticəsində ata ağır xəsarət alıb, körpənin isə kəllə sümüyündə çat yaranıb.

Yaralı ata və övladı dərhal Yalova Eğitim ve Araştırma Hastanesi xəstəxanasına çatdırılıb və müalicə altına alınıb.

Hadisə ilə bağlı açıqlama verən Türkiyənin ədliyyə naziri Akın Gürlek bildirib ki, ata və azyaşlıya qarşı zor tətbiq etməkdə şübhəli bilinən şəxs saxlanılıb və barəsində həbs qətimkan tədbiri seçilib.

Faktla bağlı araşdırma davam etdirilir.

Telegramda izləyin